Zgjedhorja/ Përbërja e Komisioneve, ja çfarë kërkon opozita që nuk pranohet nga PS

Administrata zgjedhore vijon të mbetet çështja që mban larg konsensusn mes mazhorancës dhe opozitës së bashkuar në Këshillin Politik.

Pas negociatave të zhvilluara në dy ditë mes 4 anëtarëve të Këshillit Politik, nën monitorimin e 3 ambasadorëve, Yuri Kim (SHBA), Duncan Norman (Britania e Madhe) dhe Luigi Soreca (BE), është dakordësuar një draft, përveç një pike, formulës së komisioneve zgjedhore.

Sikundër mësohet, që në fillimin e diskutimeve mbi reformën zgjedhore, opozita e bashkuar ka lidhur çështjen e identifikimit biometrik të zgjedhësve me atë të depolitizimit të administratës zgjedhore. Kjo e fundit është një nga kërkesat e OSBE/ODIHR pas zgjedhjeve të fundit.

Referuar sugjerimit të ODIHR, ekspertët e Komisionit Parlamentar të Reformës Zgjedhore propozuan që të gjithë komisionerët/ numëruesit e votave të ishin të depolitizuar dhe të zgjidheshin nga radhët e mësuesve, infermierëve apo edhe qytetarë të tjerë të Shqipërisë, të cilët do plotësonin disa kriteret për të qenë pjesë e administratës publike.

Përzgjedhja e tyre do të bëhej me short në mënyrë rastësore nga Komisioni Qendror i Zgjedhjeve. Opozita e bashkuar e kundërshtoi këtë propozim të maxhorancës, me arsyetimin se punonjësit e administratës janë të politizuar ose lehtësisht të shantazhueshëm nga Qeveria.

LEXO EDHE  Situata me COVID/ Shqiptarëve u ndalohet hyrja në Hungari

Në këto kushte, Oerd Bylykbashi e Petrit Vasili depozituan propozimin e tyre. Opozita kërkonte që nga 7 anëtarë që ka Komisioni Zgjedhor, 1 të ishte i depolitizuar e të zgjidhej nga KQZ-ja dhe 6 të tjerë të propozoheshin nga partitë politike, tre nga maxhoranca dhe tre nga opozita me të drejtë vote. Propozimi i opozitës së bashkuar nuk u pranua nga maxhoranca, me arsyetimin se në rekomandimin e fundit të OSBE/ODIHR sugjerohet depolitizimi i administratës zgjedhore.

Ndërkohë, pas ndërhyrjes së ambasadorëve, u paraqit një propozim, sipas të cilit tre komisionerë të zgjidhen nga KQZ-ja me short dhe të jenë të depolitizuar.

Ndërsa 4 të tjerë të propozohen nga partitë politike, përkatësisht dy nga maxhoranca dhe dy nga opozita, por me kushtin që komisionerët politikë të mos kenë rol vendimmarrës, por vetëm si vëzhgues.

Kjo pikë nuk pranohet nga opozita, e cila kërkon që komisionerët politikë, ose vëzhguesit, të kenë të drejtën që në rast të parregullsive të ndërhyjnë dhe të bllokojnë procesin.