Disa qindra qytetarë, kryesisht të rinj, të organizuar përmes rrjeteve sociale, kanë protestuar në Tiranë, ndaj përdhunimit të një vajze 15-vjeçare nga roja i shkollës.
Me moton “Për Fëmijërinë e Vjedhur”, në marshim morën pjesë edhe figura të njohura publike, që kanë mbështetur këtë protestë, e cila vijoi përgjatë Bulevardit “Dëshmorët e Kombit” dhe më pas vijoi te Ministria e Arsimit, ku nën thirrjet “turp turp turp” kërkohet dorëheqja e Besa Shahinit nga posti ministror.
“Ministria e Turpit”, ishte një nga pankartat që mbanin në duar të rinjtë, ndërsa në muret e Ministrisë së Arsimit u shkruaj “Përdhunues”.
Protestës i janë bashkuar figura të njohura publike, akademikë dhe pjesëtarë të shoqërisë civile.
“Në mbështetje të nismës për reagim ndaj çdo forme të dhunimit dhe abuzimit! #mos hesht! Turp është të heshtësh! Reago! Më ke mbështetje!”, shprehet ish-depzutetja Grida Duma.
Këngëtarja e njohur Aurela Gaçe, e cila iu bashkua marshimit-protestë, tha jam këtu për t’i kërkuar shtetit tim që të vendosë një ligj të fortë.
“Dua të di ku të shkoj të ankohem dhe nëse flas, duhet të dëgjohem. Nëse gratë dhe vajzat kanë frikë të flasin, për mua vjen ndoshta nuk kanë ku të ankohen. Është për të ardhur keq që të fajësosh viktimën. Fëmija do vetë? Një 8 vjeçar i abuzuar do vetë? Kjo është absurde. Jam këtu për të bërë detyrën si qytetare e këtij vendi, ndërsa në shtëpi bëj detyrën si prind. Fëmijët kanë frikë pasi pedofilët u thonë të vrasë mamin, apo babin”, tha Gaçe.
Në formën e një marshimi, nga sheshi Skënderbej drejt bulevardit “Dëshmorët e Kombit, sheshi “Nënë Tereza” dhe më pas në drejtim të Ministrisë së Arsimit, kanë marshuar sot nëna me fëmijë, artistë, gazetarë, politikane dhe përfaqësues të shoqërisë civile për t’i thënë stop dhunës ndaj të miturve.
Babai i 15-vjeçares së abuzuar seksualisht nga roja i shkollës, një 65-vjeçar, dhe tre djem të tjerë është bërë pjesë e marshimit masiv i cili mori shkas nga rasti i rëndë.
Ai ka kërkuar mbështetje dhe ndihmë nga institucionet për të siguruar një shtëpi të re pasi ai dhe familja janë në hasmëri me familjen Doga dhe ndihen të rrezikuar çdo ditë.
Babai i vajzës nuk ka lënë pa përmendur as kryeministrin Rama të cilit i ka dhënë “një shuplakë” duke thënë se për të dhe vajzën e tij s’bëri gjë sepse nuk ka vajzë vetë.
“Dëgjova në parlament sot se Edi Rama denoncoi atë djalin. Po për mua çfarë bëri Edi Rama. Nuk ka vajzë ai, ka djalë. Unë e dëgjova parlamentin në televizor”, tha ai.
