Zgjedhorja/ “S´ka tym të bardhë”, por ambasadorët janë optimistë. Prapaskenat

Këshilli Politik gjatë ditës së sotme u zhvendos nga Pallati i Kongreseve ku deri më tani ka zhvilluar mbledhjet në rezidencën e Ammbasadës së SHBA, atje ku bashkë me Ambasadoren Yuri Kim dhe kolegët e saj, Duncan Norman të Britanisë së Madhe, dhe Luigi Soreca të BE, kanë diskutuar mbi 3 çështjet e mbetura pezull: identifikimi biometric, depolitizimi i Komisioneve Zgjedhore dhe trajtimi i ankesave.

Të tre ambasadorët përveç takimit të përbashkët me 4 anëtarët e Këshillit Politik, Oerd Bylykbashi dhe Petrit Vasili nga opozita e bashkuar, Damian Gjiknuri i PS dhe Rudina Hajdari e asaj që konsiderohet “opozita parlamentare”, kanë konsumuar plot 9 orë në negociata.

Nga ajo çfarë u deklarua publikisht nga diplomatja amerikane, duket se qëllimi i angazhimit të Yuri Kim dhe kolegëve të saj ambasadorë, ishte përmbushja e çështjeve që konsiderohen nga ODIHR si prioritare.

Kjo do të thotë se çështje që kanë të bëjnë me qeverinë tranzitore apo sistemin zgjedhor dhe listat e hapura, nuk janë prioritet i Trojkës së Ambasadorëve, por ata nuk i kundërshtojnë nëse palët bien dakort.

Në këtë mënyrë duket se Ambasadorët kanë thjeshtuar punën e tyre “bindëse” për politikën shqiptare për gjetjen e një konsensusi, duke u ndalur vetëm në ato që mund të konsiderohen si çështje teknike në një proces, por që nga njëra palë konsiderohen si garanci për zgjedhje të lira dhe të ndershme, ndërsa nga pala tjetër si një mundësi për “fitimin e zgjedhjeve në tavolinë”.

LEXO EDHE  Sa kohë do t’i duhen ekonomisë shqiptare të kthehet në normalitet? Skenarët e rimëkëmbjes

Pa mundur të arrijnë një marrëveshje ditën e sotme , ambasadorët pavarësisht lodhjes që shfaqën nga negociatat e gjata, dhanë mesazhin se qëllimi i punës së tyre do të jenë pikërisht rekomandimet e ODIHR.

Dhe kjo duket se përbën edhe optimizmin e diplomatëve, që kanë thjeshtuar diskutimet në një tryezë me përfaqësuesit e formacioneve politike. Kjo do të thotë se po ushtrohet një “presion” që në rast se nuk ka konsensus, atëherë Reforma Zgjedhore mund të kalojë në Kuvend, me votat e PS dhe asaj që konsiderohet si “opozita e re”, e cila pavarësisht se ka vënë si kusht çështjen e sistemit zgjedhor, me shumë gjasa do të ngrejë kartonat për të miratuar ato rekomandime që përfshihen në raportin e OSBE/ODIHR.

Raporti i OSBE/ODIHR për zgjedhjet e mëparshme, vë në dukje, se rekomandime të tilla si depolitizimi i administratës zgjedhore, kufizimi i përqëndrimit të pronësisë së medias, garantimi i pavarësisë editoriale të transmetuesit publik dhe ndalimi i prodhimit të materialeve mediatike nga partitë politike duhen plotësuar përmes kryerjes së reformës zgjedhore.

OSBE/ODIHR nxjerr në dritë presionin e ushtruar ndaj të punësuarve në administratën publike “për të demonstruar preferencën e tyre politike”, votimin familiar, moslejimin e hyrjes së pavarur të votuesve me aftësi të kufizuar në 2/3 e gjithë qendrave të votimit dhe mospërputhjen e shifrave zyrtare për pjesëmarrjen në votime me ato të opozitës.