Ministri i Rindërtimit dhe koordinator për hartimin e Planit Kombëtar të Rimëkëmbjes, Arben Ahmetaj, reagoi sot lidhur me vlerësimin e Bankës Botërore për ndikimin që COVID-19 ka lënë në ekonomi.
Ndërsa është ndalur te paralajmërimi i Bankës Botërore, sipas të cilës “shkalla e varfërisë në Shqipëri mund të rritet me 4-8%, duke shkuar në rreth 40% në skenarin e parë dhe skenari i dytë te 44%”, Ahmetaj tha se Banka Botërore i referohet vitit 2012”.
“Ky raport nuk është një raport tradicional i ecurisë ekonomike të Ballkanit Perëndimor apo Shqipërisë, por është vetëm një fotografim i dëmeve të mundshme momentale nga COVID-19.
Çdo aktor politik apo i çdo fushe tjetër që e trajton ndryshe, ose është jo profesional, ose është i qëllimtë për të dezinformuar.
Raporti i referohet para krizës Ballkanit Perëndimor dhe thekson se punësimi arriti nivelin më të lartë historik në vitin 2019 me 45.6% për grup moshat 15 vjeç e sipër”, tha Ahmetaj.
Sipas tij, gjatë dy viteve të fundit rritja e pagës minimale e ka rritur pagën mesatare mbi 12% në rajon, ndërsa Shqipëria renditet me 18% rritje.
“Shkalla e papunësisë ka rënë në nivele të ulëta rekord në Ballkanin Perëndimor dhe në Shqipëri arriti një nivel të ulët për 11.5%.
Por çfarë paralajmëron Banka Botërore?
Sipas simulimeve të kryera për këtë shënim vlerësohet se shkalla e varfërisë në Shqipëri mund të rritet me katër deri ne 8%, duke shkuar në rreth 40% në skenarin e parë.
Skenari i dytë që mund të ishte më i keq mund të shkonte te 44% dhe ajo që paralajmëron Banka Botërore i referohet vitit 2012. Pra sipas skenarit të parë varfëria do mund të arrite si në vitin 2012, ku është lugina më e thellë e varfërisë.
Ne jemi të përgatitur dhe ndërkohë do të prezantojmë planin e ringritjes ekonomike.
Rëndom dilet në bizneset e vogla. Ne në paketën e parë dhe të dytën i shërbyem me pagesë 400 mijë lekë të vjetra gjithë punonjësve të biznesit të vogël.
Hoqëm tatim fitimin e biznesit të vogël për të gjitha bizneset deri në 14 milion lekë xhiro në vit dhe i shtymë tatim fitimin për të gjithë bizneset e tjera në afate të ndryshme”, u shpreh Ahmetaj.
