Ardi Veliu kërkon të shfajësohet pas deklaratës skandaloze të bërë prej tij për fëmijën që u dhunua nga policia te Liqeni Artificial në Tiranë disa ditë më parë dhe të ëmën.
Kryepolici u paraqiti një video deputetëve të Komisionit të Sigurisë këtë të Premte, në të cilën dukej e ëma e djalit që u dhunua te liqeni, me armë. Veliu i përdori pamjet për të poshtëruar familjen e djalit duke u shprehur “shihni nga çfarë familje vjen” dhe justifikuar dhunën e policëve ndaj të miturit. Kryepolici në fakt gënjeu në mënyrë flagrante, pasi pamjet i përkasin një filmi shqiptar, ku e ëma e djalit luan si aktore. Kjo e fundit e përgënjeshtroi kryepolicin duke zbuluar të vërteten.
Video ka shkaktuar mjaft reagime në rrjetet sociale, me qytetarë e persona publikë që dënojnë sjelljen e kreut të Policisë së Shtetit. Partia Demokratike, ndërkohë, kërkoi dorëheqjen e Veliut.
Ky i fundit, në një reagim, është shprehur se nuk ka ndërmend të japë dorëheqjen.
Madje, sipas tij, policia u baltos nga kundër-reagimet që erdhën natyrshëm pas deklaratës skandaloze të kryepolicit.
“Jam i keqardhur që Policia e Shtetit bëhet rregullisht shënjestra e atyre që kurrë nuk e thanë një fjalë motivuese për të dhe sot përsëri e njëjta gjë. Ndërkohë që ne jemi organizata më rigoroze në goditjen e fenomeneve brenda vetes, mjafton që një punonjës i ynë të bëjë një gabim dhe megjithëse ndëshkohet në radhë të parë prej nesh, prapëseprapë goditja vijon ndaj Policisë së Shtetit. Sot unë jam vënë personalisht në shënjestër dhe më vjen keq për deformimin që po i bëhet realitetit të ngjarjes për të cilën fola dhe vetë qasjes sime ndaj saj. Së pari, fjala ime nuk mund të nxirret nga konteksti siç po bëhet. Së dyti, kam bërë një ilustrim të idesë se nuk mundet të fajësohet gjithnjë e vetëm punonjësi i Policisë duke u kapur pas një fotoje të rastit, pa konsideruar tërë kontekstin e një situate. Së treti, kam sqaruar se punonjësi në fjalë është pezulluar dhe ka nisur hetimi disiplinor dhe penal për të. Së katërti, unë po komunikoja hapur me deputetët, një shqetësim që është i mbarë punonjësve tanë, për demonizimin që i bëhet figurës së Policit të Shtetit dhe nuk doja të thosha më shumë se kaq”, thuhet në reagim.
Më tej në reagim, Veliu bën dhe ‘viktimën’ dhe kërkon një gjysmë ndjesë. Ndjesë që në fakt e kërkon “nëse ka krijuar një keqkuptim”, kur në fakt ajo që artikuloi ishte një ofendim sade ndaj së ëmës dhe familjes së djalit që u dhunua mizorisht nga efektivë të policisë me augmentin “se nuk iu bind urdhrit të tyre”. E gjitha e mbështetur në një gënjeshtër!
“Por në fund dëshiroj t’u them të gjithë atyre që po e gjykojnë me ngut këtë “krim” të radhës, se nëse nuk kam arritur dot ta sqaroj si duhet atë çka kisha qëllim, kjo nuk mjafton për të më gjykuar me qëllim. Këtë detyrë e kam mbajtur dhe do ta mbaj deri në fund me nder dhe puna ka folur e do të flasë për mua dhe Policinë e Shtetit më mirë se sa fjalët tona. Ndjesë nëse kam krijuar një keqkuptim me komentin tim dhe besoj se kushdo që do të gjykojë pa paramendim dhe pa e menduar edhe këtë si rastin e radhës për të baltosur Policinë e Shtetit, do të gjejë arsye për ta pranuar ndjesën time”, mbyllet reagimi.
