Kristaq Kume, ish-kryetar i Komisionit Qendror të Zgjedhjeve (KQZ), analizoi në Euronews Albania zhvillimet e fundit për sa i përket reformës zgjedhore.
“Besoj se ajo që është marrë përsipër, se faza e parë, draftimi i reformës, do të realizohet,” – tha Kume, i cili u shpreh se data 31 maj nuk mund të konsiderohet tabu, duke nënkuptuar këtu se kapërcimi i këtij afati nuk do të ishte problem.
Opozita jashtëparlamentare e ka konsideruar tejet të rëndësishëm përdorimin e teknologjisë në procesin zgjedhor.
Kume i referua deklaratave të fundit të palëve dhe tha se teknologjia kërkohet për identifikimin biometrik të votuesve.
“Zhvillimet e fundit në Këshillin Politik po tregon se ajo çka kanë arritur palët mes tyre në lidhje me kërkesat e mazhorancës për mundësitë e votimit të emigrantëve dhe e opozitës jashtëparlamentare për përdorimin e teknologjisë së informacionit është kthyer tashmë në qendër të vëmendjes së punës së Këshillit,” – tha Kume, teksa vlerësoi arritjen e një dakordësie në parim mes palëve.
Monitorimi me kamera i qendrave të votimit dhe teknologjia për identifikimin e votuesve është pranuar, por numërimi dhe votimi elektronik jo, pasi kërkon implementimin me një proces pilot.
Opozita e kërkon të detyrueshëm identifikimin me teknologji, ndërsa mazhoranca e kundërshton përcaktimin si të tillë pasi në disa zona mund të mos jetë e mundur.
Ndryshimi i administratës zgjedhore mbetet çështje në diskutim. Kume analizoi të dy propozimet e palëve.
“Propozimi i mazhorancës, ndërton një administratë e cila do të jetë kriptopolitike, atje do të jenë njerëz që do të kenë mbështetje politike por nuk do të jenë të ardhur aty me nxitje të politikës, natyrisht pa u deklaruar se i përkasin një krahu të caktuar politik. Eshtë thënë se çdo qytetar mund të aplikojë dhe çdo parti mund t’i nxisë qytetarët të regjistrohen, kështu nuk ndryshon gjë,” – tha Kume.
“Opozita propozon një administrator jopolitik që e përcakton KQZ-ja dhe 6 të tjerë të balancuar 3 opozitë, 3 mazhorancë, por administratori vetëm administron procesin dhe grupi tjetër monitoron dhe ndërhyjnë e marrin vendime nëse duhen, kështu administrimi mbetet politik,” – u shpreh Kume teksa e konsideroi çështjen e administrimit zgjedhor si “patate shumë e nxehtë”.
