Nga Boldnews.al
Aktivitete sportive publike nuk janë hapur, por Blendi Gonxhja, kur nuk e kishte problem të hapte digën e Liqenit Artificial dhe përbyste gjysmën e Tiranës së Re, se ka fare për gjë të urdhërojë hapjen e kalçetove, për argëtimin e tij personal dhe të miqve të tij, që të gjithë drejtorë të “mëdhenj” në bashkinë e Lali Erit. Këtë e bëjnë haptas, me prepotencë, e madje e shesin si “vlerë personale” në rrjetet sociale, në pritje të qindra apo mijëra likeve dhe komenteve nga shushunjat e administratës dhe miqtë e qejfit.
U bënë bashkë çunat…! Genci, Tao, Blendi dhe drejtorë të tjerë, për një kalçeto. Në foton e publikuar vetë nga protagonistët “kara-ntinë thyes”, shfaqet Blendi Gonxhe , Drejtori i Përgjithshme të Shërbimeve të Transportit Rrugor; Genc Kojdheli, Drejtori i Pergjithshëm i Projekteve Strategjike dhe Zhvillimit Ekonomik në Bashkinë Tiranë; dhe Taulant Tusha, Drejtori i Përgjithshëm i Punëve Publike në Bashkinë Tiranë. Edhe pjesa tjetër e “ekipit kampion”, po drejtorucë janë, çuna me lekë…!
Nuk është fjala vetëm për një argëtim, pasi gjithkush nga qytetarët mund të luajë dhe argëtohet, por në zbatim të rregullave. Të paktën të atyre vendimeve që nxjerr kryeministri, i cili çdo ditë kërcënon shkelësit se do i presë burgu. Po ku ka burg për këta VIP-a që nuk e kuptojnë se janë kthyer në persona që të gërryejnë stomakun, pasi benefitet e pushtetit dhe paligjshmëritë që mbyllen me korrupsion i shesin si vlera?!
Ndërsa qytetarët rrëmbehen në rrugë nga policia se përse dalin jashtë orarit kryeministror të karantinës, qoftë edhe për të blerë një bidon ujë, drejtorët e Rilindjes kanë tjetër ligj. Ata janë të ngarkuar shumë me punë! Qëndrojnë me orë të gjata duke bërë like në rrjetet sociale, apo edhe u dalin trutë vendit nga tendera dhe alleshverishet. Në fund këta bij të denjë të pushtetit, e “meritojnë” shlodhjen, argëtimin dhe kredhjen në aktivitete sportive, duke thyer haptas jo vetëm ligjin (pasi ai për ta ai nuk ekziston), por mbi të gjitha urdhrin e kryeministrit.
Edhe vetë brenda radhëve të Rilindjes, disa që shkelin urdhrin e “nalgjatësisë së tij” shkarkohen, por të tjerë përkedhelen. Një muaj më parë, shefi i Qarkullimit Rrugor në Vlorë Rustem Plaka, është shkarkuar nga detyra nga Drejtori i Përgjithshëm i Policisë sepse po luante futboll bashkë me miqtë e tij.
Po sot ka dy pushtete, një i Ramës dhe një tjetër i Veliajt, ku ky i fundit, bashkë me luguninë e tij të drejtuesve që mban afër, po sfidojnë me jetën që bëjnë, me daljen hapur kundër ligjeve, penale apo administrative. Prepotenca e Lali Erit nuk është më vetëm mirazh, por një fakt që po shihet me shqetësim nga të pushtetshmit e tjerë në qeverisjen qëndrore. Të dyja palët po mburren se kush po krijon më shumë pushtet ekonomik dhe politik; cili di të rrëmbejë paranë publike dhe ta firojë rrugës, apo kush të krijojë me tepër grupin e aligarkëve.
Ndryshimi është se Lali Eri nuk po përmbahet më, bashkë me çunat e tij, “ekipin fantastik” sikurse e konsideron ai. Por ky ekip është i “veçantë” në llojin e vet, kanë një prerje ndryshe. Çuna të qejfit, të dashuruar pas luksit, të fiksuar pas së “bukurës” dhe sqimatarë në kulinarinë e shendetshme. Ata afishojnë një botë të re (të vërtetë që e përjetojnë vetëm ata), ndërsa në media i ofrojnë qytetarëve botën surreale e cila nuk ekziston. Një pjellë e re që po sfidon këdo, aq sa ka xhelozuar edhe kryeministrin Edi Rama, teksa sheh fuqinë që ka marrë Lali Eri dhe bashkëpunëtorët e tij të ngushtë. Lejet e shumta të ndërtimit, tenderat e pafundme në punë publike në qindra milionë euro dhe aktivitetet propagandistike ku hidhet paraja lumë, jane ata elementë që po krijojnë “njeriun e ri Rilindas”.
Një prej personave që gëzon mbështetjen e të dyve, Lali Erit dhe Edi Ramës padyshim që konsiderohet Blendi Gonxhe, që tashmë ka shpërthyer me rolin e tij vendimarrës. Nga Gushti 2015, Blendi Gonxhe iu bashkua ekipit të ri të Bashkisë Tiranë të drejtuar nga Erion Veliaj, si Drejtor i Përgjithshëm i Ndërmarrjes Nr. 1 të Punëtorëve të Qytetit.
Nga Tetori 2015, Gonxhe drejtoi Agjencinë e Parqeve dhe Rekreacionit të themeluar nga Bashkia Tiranë.
Prej dorës së tij doli edhe ai projekti i betonizimit të Parkut të Liqenit Artificial në Tiranë. Nga “idetë brilante” të Gonxhes së dashur të dy të mëdhenjve janë edhe ata miniparqe që kanë rrëbyer miliona euro, por duken kaq të vogla para vlerës që është shpenzuar. Janë bërë kaq të fuqishëm sa drejtorët e Lali Erit nuk pyesin më as për urdhrat e Edi Ramës, duke e sfiduar aty ku “naltgjatësia e tij” nuk duron, prishjen e imazhit…!
