Shqipëria nga 1 Qershori ka marrë vendim për hapjen e kufijve tokësorë, kurse Kosova ende s’ka ndonjë datë caktuar për hapjen e korridoreve me shtetet fqinje. Për këtë çështje sot ka folur ministri i Shëndetësisë, Arben Vitia. Kosova nga 1 qershori nis zbatimin e fazës së tretë të lehtësimit të lëvizjes.
Ministri në detyrë, Arben Vitia së bashku me ministrin në detyrë të Punëve të Brendshme dhe Administratës Publike Xhelal Sveçla, kanë mbajtur një konferencë për media në qendrën e administratës së QKUK-së.
Ministri Vitia është përgjigjur lidhur me hapjen e kufijve tokësorë përkatësisht, hapjes së kufirit mes Kosovës dhe Shqipërisë, duke thënë se janë në bashkëpunim me IKSHPK-në dhe për këtë çështje do të njoftohen të gjithë pas datës 1 qershor kur edhe fillon faza e tretë e masave.
“Ne jemi në bashkëpunim të vazhdueshëm me IKSHPK-në, dhe të gjitha rekomandimet siç e keni parë i kemi marr masat, jemi në përgatitje të shumë vendimeve të tjera që do të merren nga data 1 qershor dhe në momentin që do të merret vendimi për hapjen e kufirit me Shqipërinë do të njoftoheni me kohë”, ka thënë Vitia.
Në anën tjetër, gjatë ditës së djeshme disa kompani autobusësh në Kosovë, tashmë kanë nisur edhe organizimin dhe parapërgatitjet për linjat e tyre drejt Shqipërisë.
Madje, në faqe zyrtare të tyre, një nga to ka dhënë informacione për udhëtarët e saj, se nga e hëna nisin me orar të rregullt të udhëtimeve drejt shtetit amë.
Sipas së njëjtës kompani linja të rregullta do të ketë Prishtinë – Tiranë – Durrës dhe anasjellas, po ashtu edhe Tiranë – Prizren – Prishtinë.
Në anën tjetër, kompanitë turistike, përveç ofertave për pushime verore që kanë bërë për hotele në Shqipëri e Mal të Zi, ende nuk kanë dhënë detaje rreth të njëjtave se kur mund të nisin.
Gjithsesi edhe Mali e Zi e Maqedonia e Veriutn ga e hëna do të heqin kufijtë.
Ditë më parë, edhe ambasadori shqiptar në Kosovë, Qemajl Minxhozi, ka thënë se tashmë kanë marrë vendim dhe në ditët e para të qershorit do të mund të hapet kufiri Kosovë-Shqipëri.
Ambasadori Minxhozi thotë se rihapja e kufirit vetëm nga pala shqiptare nuk do të kishte kuptim dhe pret që së shpejti të marrë një vendim edhe Kosova.
“Shpresoj që ndoshta, jo me 1 qershor por shumë shpejt edhe Kosova do t’i rihapë kufijtë me Shqipërinë, sepse nuk do të kishte sens nëse do të hapet vetëm një drejtim. Dhe unë shpresoj që edhe Kosova në ditët e para të qershorit do të hapë kufirin për Shqipëri. Nuk ka vlerë të jetë vetëm një hap i njëanshëm”, është shprehur Minxhozi.
Kosova ende nuk ka një vendim zyrtar për hapjen e kufirit, por kryeministri në detyrë Albin Kurti ka thënë se këtë javë do të merret vendimi për hapjen e kufirit me Shqipërinë.
Kurti tha se ky vendim do të bazohet në rekomandimet e Institutit Kombëtar të Shëndetësisë Publike të Kosovës (IKSHP).
“Edhe në këto ditë të kësaj jave duhet ta marrim këtë vendim, duke u bazuar edhe në Institutin Kombëtar të Shëndetësisë së Kosovës, që kufiri mes Shqipërisë dhe Kosovës të hapet sa më parë. Duam të marrim në vendim politik, por përbrenda të kenë rekomandimet shkencore të Institutit përkatës”, është shprehur Kurti.
Kujtojmë se kufijtë nga shumica e vendeve të botës janë mbyllur që në ditët e para kur u shënuan raste me Koronavirus.
Kështu ka ndodhur edhe në Kosovë që nga ditët e para kur Organizata Shëndetësore e Shëndetësisë (OBSH) e ka shpallur koronavirusin pandemi globale më 11 mars. /Monitor/
