Klasikja gjermane mes Dortmundit dhe Bayern Munich u mbyll me rezultatin 0-1 në favor të bavarezëve. Kjo humbje ishte një goditje e rëndë për verdhezinjtë në luftën e tyre për titull kampion, pasi diferenca me Bayern-in tashmë shkon në 7 pikë.
Gjithsesi një sfidë e madhe si kjo nuk mund të kalonte pa polemika. Pas ndeshjes e gjithë vëmendja është përqendruar në goditjen e Haaland që u ndalua me dorë nga Boateng. Një episod ky që nuk u vu re nga asnjë futbollist i Dortmundi-t gjatë ndeshjes.
Eksperti i futbollit gjerman, Raphael Honigstein, ka ngritur dyshimet e tij se si një episod i tillë flagrant u injorua nga VAR-i, që sipas tij duhej të kishte ndalur lojën duke njoftuar arbitrin kryesor për të hetuar rastin.
“Duhet të flasim për bërrylin e Boateng, ishte një moment kyç i ndeshjes. Kjo është një skenë që mendoj se askush nuk e pa gjatë lojës. Ndërsa Boateng kthehet ai zgjat bërrylin, ndërsa nuk kishte protesta nga Haaland.”
“Por VAR vëzhgon gjithçka dhe mund të mendosh si ka mundësi që loja nuk u ndal dhe arbitri të shihte përsëritjen e rastit. Ky rast mund të ndryshonte rezultatin e ndeshjes.” – ka thënë Honigstein.
