Tirana është epiqendra e epidemisë së Covid-19 në Shqipëri,ku aktualisht sipas shifrave zyrtare të Ministrisë së Shëndetësisë, numërohen 101 raste aktive nga 205 që janë në total.
Por ajo që tërheq vëmendjen është fakti se në 48 orët e fundit në Tiranë janë zbuluar 45 raste, 24 ditën e martë dhe 21 ditën e sotme.
E ndërsa në kryeqytet, në atë që mund të quhet si kulmi i epidemisë, raportoheshin më pak raste ditore, madje më pak se në qytete si Shkodra apo Kruja, sot ka një përmbysje totale të situatës, duke e bërë kurbën qesharake.
Pavarësisht deklarimeve zyrtare se rastet e zbuluara janë asimptomatike, shifrat e publikuara ose krijojnë mosbesim, ose tregojnë se në muajt mars dhe prill nuk është kryer hetimi epidemiologjik ashtu sikundër pretentohet.
“Në 24 orët e fundit vazhdon të jetë i lartë numri i rasteve te reja te prekur me Sars-Cov2 në Tiranë, ndërsa të gjithë zonat e tjera rezultojnë pa raste të reja.
Janë testuar 262 qytetarë të dyshuar të prekur me COVID-19 dhe janë konfirmuar 21 raste pozitive, të gjitha në Tiranë,” deklaroi Ministria e Shëndetësisë.
Çudia më e madhe është fakti se nga 24 rastet e zbuluara dje, mbi 50 % e të cilave ishin në një call center, dhe sot me personelin mjekësor të QSUT, ku rezultojnë të infektuar 13 persona.
Pyetja që lind është si ka mundësi që në kulmin e epidemisë mars-prill, kohë kur edhe virulenca ishte më e lartë, dhe call center ishin të hapura dhe personeli mjekësor ishte më i ekspozuar, nuk ka pasur një nivel të tillë infektimi?
Zyrtarisht mund të thuhet se rastet e evidentuara kanë lidhje me hapjen ose me heqjen e masave kufizuese, ndonëse mjekë infeksionistë dhe epidemiologë, prej ditësh shprehen se forca e virusit, jo vetëm në Shqipëri, por pothuajse në gjithë Europën, ka një rënie 2-3 herë.
