Kryeministri Edi Rama i rikthehet idesë për rikthimin e kooperativave. Nga Lushnja, ku bashkë me ambasadorin e BE-së, Luigi Soreca, panë nga afër punën në bujqësi dhe zhvillimin e fermave, Rama u bëri apel fermerëve që të organizohen në kooperativa, si e vetmja zgjidhje, që prodhimet të shiten.
“Kjo është tamam kooperativë, por me interesin individual të secilit, sipas asaj që prodhon. Është e vetmja zgjidhje, nuk bëhet më të prodhojë secili dhe pastaj dil në protestë ku ti shesim. Ja ky është sistemi, është i vetmi sistem. Shumë gjë e madhe ky program, se njerëzit e shikojnë fshatin nga larg dhe e vetmja gjë që marrin vesh është kur dalin ato kronikat që thonë nuk na shiten prodhimet.
Kemi rilindur bujqësinë dhe për këtë flasin faktet. Me durim duhet të bëjmë gjithçka. Media nuk merret me lajmet e mira, por me të këqijat. Merret me disa që hedhin në tokë domatet e nuk sheh këtë realitet, sepse nuk dëshiron. Ne si qeveri jemi në mbështetje të bujqësisë, Shqipëria e BE po investojnë në sektorët bujqësorë”, tha Rama.
