Shqipëria nga 1 Qershori ka marrë vendim për hapjen e kufijve tokësorë, derisa Kosova ende s’ka ndonjë datë caktuar për hapjen e korridoreve me shtetet fqinje, edhe pse sipas MSH-së, është thënë se kjo do të mund të ndodhë me fillimin e Fazës së Tretë, me ç’rast pritet të hapen kufijtë tokësor e ajror.
Në fazën e tretë në Kosovë, nis zbatimin pikërisht me 1 Qershor apo nga kjo e hënë.
Në anën tjetër, disa kompani autobusësh në Kosovë, tashmë kanë nisur edhe organizimin dhe parapërgatitjet për linjat e tyre drejt Shqipërisë.
Madje, në faqe zyrtare të tyre, një nga to ka dhënë informacione për udhëtarët e saj, se nga e hëna nisin me orar të rregullt të udhëtimeve drejt shtetit amë.
Sipas të njëjtës kompani linja të rregullta do të ketë Prishtina – Tiranë – Durrës dhe anasjelltas, po ashtu edhe Tiranë – Prizren – Prishtinë.
Në anën tjetër kompanitë turistike, përveç ofertave për pushime verore që kanë bërë për hotele në Shqipëri e Mal të Zi, ende nuk kanë dhënë të detaje rreth të njëjtave se kur mund të nisin.
Gjithsesi edhe Mali e Zi e Maqedonia Veriore nga e hëna do të heqin kufijtë.
Ditë më parë edhe ambasadori shqiptar në Kosovë , Qemajl Minxhozi ka treguar se tashmë kanë marrë vendim dhe në ditët e para të qershorit do të mund të hapet kufiri Kosovë-Shqipëri.
Ambasadori Minxhozi thotë se rihapja e kufirit vetëm nga pala shqiptare nuk do të kishte kuptim dhe pret që së shpejti një vendim të merr edhe Kosova.
“Shpresoj që ndoshta, jo me një qershor por shumë shpejt edhe Kosova do t’i rihapë kufijtë me Shqipërinë, sepse nuk do të kishte sens nëse do të hapet vetëm një drejtim. Dhe unë shpresoj që edhe Kosova në ditët e para të qershorit do të hapë kufirin për Shqipëri. Nuk ka vlerë të jetë vetëm një hap i njëanshëm”, është shprehur Minxhozi.
Kosova ende nuk ka një vendim zyrtar për hapjen e kufirit, por kryeministri në detyrë Albin Kurti mbrëmë u shpreh se këtë javë do të merret vendimi për hapjen e kufirit me Shqipërinë.
Kurti tha se ky vendim do të bazohet në rekomandimet e Institutit Kombëtar të Shëndetësisë Publike të Kosovës (IKSHP).
“Edhe në këto ditë të kësaj jave duhet ta marrim këtë vendim, duke u bazuar edhe në Institutin Kombëtar të Shëndetësisë së Kosovës, që kufiri mes Shqipërisë dhe Kosovës ta hapet sa më parë. Duam të marrim në vendim politik, por përbrenda të kenë rekomandimet shkencore të Institutit përkatës”, është shprehur Kurti.
Kujtojmë se kufijtë nga shumica e vendeve të botës janë mbyllur qysh në ditët e para kur janë shënuar raste me Koronavirus.
Kështu ka ndodhur edhe në Kosovë qysh nga ditët e para kur Organizata Shëndetësore e Shëndetësisë (OBSH) e ka shpallur koronavirusin pandemi globale më 11 mars. Prej atëherë udhëtimi jashtë vendit gati se është ndaluar plotësisht, pasi ka pasur vetëm udhëtime nën kontrollin e autoriteteve. /Monitor/
