Ministria e Infrastrukturës dhe Energjisë, përmbylli ankandin ndërkombëtar për ndërtimin e parkut fotovoltaik të Karavastasë, i cili do të jetë parku energjetik më i madh me energji solare në Ballkan.
Fitues i ankandit për ndërtimin e këtij parku u spall kompania franceze Voltalia, e cila kishte bërë edhe ofertën financiare prej 24.89 euro, për MËh.
Pas përmbylljes së ankandit ministrja Belinda Balluku vlerësoi çmimin e ofruar nga kompania duke e cilësuar atë si një çmim rekord për parqet energjitike.
“Ky është një çmim rekord, për të gjitha parqet energjetike. Ne shpesh i jemi referuar parqeve të ndërtuara në Jordani, apo në zona ku piku i diellit është shumë më i lartë, pra dhe prodhimi është më i lartë, me çmime 26 euro. Ndërkohë ne kemi ardhur sot në këtë ditë, që të kemi një park energjetik me 24.89 euro nga kompania Volttalia, që është një nga kompanitë më të mëdha europiane me kapital 100% francez”, deklaroi Balluku.
Ndërkohë ministrja vlerësoi maksimalisht edhe kompanitë e tjera të përfshira në garë, duke theksuar se ato janë kompani me emër jo vetëm në Europë por edhe në vende të tjera.
“Kjo është një garë e suksesshme, pasi ka pasur konkurrencë dhe ajo që është më e rëndësishmja, diçka të cilën mund ta faktojnë edhe konsulentët e BERZH, të cilët kanë qenë pjesë e pandarë e të gjithë këtij procesi dhe e grupit të punës, ka qenë një proces transparent nga fillimi deri në fund. Një proces i bazuar mbi garën dhe sigurisht të pesta kompanitë kanë pasur mundësi që të vlerësohen nga grupi ynë i ekspertëve dhe nga grupi i BERZH për të kaluar fazën e pare”, tha Balluku.
Investimi për ndërtimin e Parkut Fotovoltaik të Karavastasë në zonën e Divjakës dhe të Fierit do të kapë shifrën e mbi 100 milionë eurove. Parku fotovoltaik do të ketë një kapacitet të instaluar prej 140 megavat energji, të ndara sipas një skeme ku 70 megavat do të jenë me çmim të parashikuar dhe 70 megavat do të tregëtohen në tregun e lirë. Afati i projektit është 30-vjeçar dhe për kapacitetin 70 megavat me çmim të parashikuar, kemi një kontratë shitblerje energjie për një afat 15-vjeçar.
