Ndërsa moti ngrohet dhe kufizimet për frenimin e koronavirusit po hiqen, politikanët italianë këshilluan qytetarët të tregojnë kujdes dhe të respektojnë masat paraprake shëndetësore, duke paralajmëruar se në të kundërt mund të rrezikojnë një valë tjetër infeksionesh dhe rivendosjen e masave kufizuese.
Plazhet në të gjithë vendin duhej të rihapeshin të hënën, por u hapën më herët në shumë rajone.
Pamjet në televizione treguan se plazhet në Siçili, ishin të mbushura plot, por vetëm disa pushues përdornin maska mbrojtëse.
Në Romë, Napoli, Gjenovë dhe qytete të tjera, të rinjtë iu drejtuan bareve në mbrëmje dhe shumë u mblodhën në grupe pa respektuar masat distancuese ose pa përdorur maska.
Politikanët në Romë dhe në të gjithë vendin u përgjigjën me shqetësim.
“Pasi kanë qëndruar në shtëpi për kaq shumë kohë, të rinjtë kanë humbur vëmendjen e limiteve”, deklaroi ministrja e Brendshme, Luciana Lamorgese.
Në disa qytete, kryetarët e bashkive mbyllën baret në mbrëmjen e hershme dhe autoritetet në Rimini, njoftuan kontrolle për të siguruar që të rinjtë të mos grumbullohen në një vend.
Për shkak të daljeve në grup dhe në mënyrë të papërgjegjshme, kryebashkiaku i Castrovillarit, Mimmo Lo Polito mbylli dy biznese dhe shpalli në Facebook një urdhër për të kufizuar orët dhe vendet që mund të vizitohen.
“Ju kujtoj se sa e rëndësishme ështe të shmangni grumbullimet për t’i dhënë të gjithëve mundësinë për t’u kthyer dhe për të shijuar lirinë e re duke respektuar masat parandaluese.Të dhënat, veçanërisht ato fotografike, tregojnë se ne nuk meritojmë besim. Për këtë, nesër, do të detyrohem të bëj një rregullore që kufizon mundësinë e qëndrimit jashtë përtej një kohe të caktuar, veçanërisht në hapësira të hapura për publikun si sheshe, shtëpi dhe vende të ngjashme. Unë gjithashtu e gjykoj veten të detyruar të mbyll deri ditën e shtunë 30 maj dy aktivitete që kanë dhënë shembullin më të keq të distancimit dhe respektimit të rregullave”, deklaroi Lo Polito.
