Legjenda e futbollit botëror, Iker Casillas, u largua nga skuadra e Real Madrid në vitin 2015 pas 16 viteve si profesionist te“Los Blancos”.
39-vjeçari spanjoll, i cili u tërhoq nga futbolli si lojtar i Portos prej problemeve në zemër, është rrëfyer për largimin e tij nga Real Madrid dhe arsyet që mori një vendim të atillë.
“Nuk kam folur shpesh për largimin tim nga Real Madrid. Në atë kohë dhashë një konferencë për shtyp i vetëm dhe u largova, një gabim i madh ky. Që nga ai moment kanë kaluar pesë vite. Pesë vite që kur kalova kufirin te fqinjët tanë në Portugali. Kisha nevojë të ndihesha ndryshe, të kisha një atmosferë dhe ambient ndryshe në mënyrë që të largohesha nga vëmendja e shtypit dhe kritikat e asaj kohe por edhe për tu përmirësuar. Është e vërtetë, çdo lojtar sado i mirë apo i keq të jetë, dëshiron të përmirësohet dhe për ta bërë këtë gjë duhet që fillimisht të përmirësohesh nga ana mendore. Kjo e fundit ishte e rëndësishme dhe e ndjeva përsëri te Porto. Mos dëgjoni të tjerët çfarë thonë për largimin tim. Kjo foto i përket një ndeshjeje mes Real Madrid kundër Getafes në sezonin 2014-2015. E dija që kjo do të ishte ndeshja ime e fundit për Real Madrid.” – ka rrëfyer Casillas në rrjetet sociale.
