Nga Boldnews.al
Një dokument e-mail, “i rrjedhur” në media së fundmi, dëshmoi se anëtarja e Këshillit Bashkiak në Tiranë, Genta Mezini, ka paraqitur dorëheqjen nga funksioni në datën 17 Maj 2020, ditën që fadromat e Inspektoratit Ndërtimor të Bashkisë së Tiranë rrafshuan godinën e Teatrit Kombëtar.
Nëpërmjet këtij dokumenti “të rrjedhur”, krijohet idea se këshilltarja Mezini ka ndërmarrë veprimin e dorëheqjes, në shenjë “revolte” për prishjen e Teatrit.
Përsa kohë që nuk ka një deklarim zyrtar prej saj për arsyet e vërteta të dorëheqjes, mund të presupozohet se ajo ka vendosur të largohet nga detyra edhe për çështjen e Teatrit Kombëtar.
Në vendimin e zbardhur nr. 50.14.05.2020 të Këshillit Bashkiak nuk janë shënuar se kush nga anëtarët ka votuar për prishjen e Teatrit Kombëtar dhe nëse ka pasur apo jo mungesa apo vota kundër.
Megjithatë, edhe nëse këshilltarja, tashmë e dorëhequr, Genta Mezini, ka refuzuar të votojë prishjen e Teatrit Kombëtar, ky fakt nuk e shndërron aspak atë në “mbrojtësen e interesit publik”.
Në Korrik 2017, vota e Mezinit ishte vendimtare që Këshilli Bashkiak i Tiranës të pranonte kërkesën e kryetarit të Bashkisë, Erion Veliaj, për rritjen e ndjeshme të çmimit të ujit të pijshëm për qytetarët e kryeqytetit.
Duke iu rikthyer kronikave të kohës, rezulton se Genta Mezini dhe Agim Kraja, të dy të zgjedhur nga listat e Lëvizjes Socialiste për Integrim, bashkuan votat me “ushtarët” e Veliajt në Këshillin Bashkiak, për të fryrë faturën e ujit të pijshëm për qytetarët.
Për shkak të kësaj sjelljeje politike, Lëvizja Socialiste për Integrim vendosi përjashtimin e menjëhershëm të dy këshilltarëve, të cilët bashkuan votat me Erion Veliajn, në dëm të financave të qytetarëve.
Madje, pati zëra nga LSI në atë kohë se dy këshilltarët e saj mund të ishin bërë “pre” e joshjes financiare.
Këshilltarja Genta Mezini, në një reagim publik pas përjashtimit nga LSI, hodhi poshtë akuzat se ishte paguar për të votuar në favor të projektit kontravers të Erion Veliajt për rritjen e çmimit të ujit të pijshëm.
Ajo e justifikoi votën e saj pro rritjes së çmimit. “Jo vetëm si qytetare e Tiranës, por edhe si mjeke në profesion, unë jam e bindur që rindërtimi, sipas standarteve të larta bashkëkohore, të rrjetit të ujësjellësit, do të minimizojë ndjeshëm edhe sëmundjet infektive që vijnë si pasojë e kontaminimit të ujit nëpër depozita dhe çisterna krejt të amortizuara…”.
Në vijim të qëndrimit të saj, Mezini deklaroi në atë kohë devotshmërinë për të përkrahur Erion Veliajn. “Jam e nderuar që më jepet mundësia të kontribuoj përkrah kryetarit të Bashkisë, z. Erion Veliaj, dhe do të bëj të pamundurën që të jap gjithë mundësitë e mia në shërbim të qytetarëve”.
Por, prej asaj kohe, duket se disa gjëra kanë ndryshuar. Erion Veliaj kontrollon 100 përqind të Këshillit Bashkiak dhe vota e Genta Mezinit “as i ul dhe as i ngre” kuotat politike të kryebashkiakut të Tiranës.
E vetmja që e sheh veten jashtë kësaj “loje” është Genta Mezini, e cila dha dorëheqjen nga anëtarësia në Këshillin Bashkiak.
