Carlo Ancelotti ka zbuluar se Zinedine Zidane e detyroi atë të ndryshojë filozofinë e tij të futbollit te Juventusi.
Trajneri italian shpjegoi se atij iu desh të ndryshonte formacionin e ekipit të tij për t’iu përshtatur lojës së francezit. Duke folur rreth kohës së tij te Juventusi në një intervistë të dhënë për “Sky Sports”, ai tha:
“Me Zidane në skuadër u detyrova të ndryshoj idetë e mia rreth sistemit të lojës që kishim. Ai ishte lojtari i parë që më dha mundësinë të ndryshoj sistemin dhe të luaj në një mënyrë tjetër. Kështu në vitin e parë që kisha Zidane te Juventus, luajta me një formacion 3-4-1-2, me Del Pieron dhe Inzaghin në sulm, ndërsa francezi i shoqëronte nga mbrapa.”
“Vitin e dytë luajta me katër mbrojtës por sulmi ishte i njëjtë me dy vetë përpara dhe Zidane mbrapa tyre. Ai më ndryshoi idetë e mia për futbollin, më parë isha fokusuar në skemën 4-4-2 dhe pas Zidanit, unë ndryshova, pasi doja që ta vendosja atë në pozitën më të mirë ku mund të shfaqte lirisht veten.”
