U “mbars” USAID-i dhe nxori sekretarë për Gjykatën e Lartë

Takimi i USAID me KLGJ per Gjykaten e Larte

Nga Boldnews.al

Agjencia Amerikane për Ndihmë, USAID-i do të investohet për të paguar disa “sekretarë” për Gjykatën e Lartë, duke e shfryrë deklarimin e mëhershëm të ambasadores Yuri Kim për një trupë “juristësh të zotë që do të ndihmojnë për uljen e stokut” të rreth 35 mijë dosjeve.

Gjykata e Lartë njoftoi pasditen e së Premtes modalitetet për përzgjedhjen e juristëve, të cilët do t’i bashkohen stafit të Gjykatës së Lartë, në bazë të një Marrëveshjeje Mirëkuptimi të nënshkruar ndërmjet Këshillit të Lartë Gjyqësor dhe USAID-it.

Në bazë të modaliteteve, trupa e “juristëve te zotë”, për të cilët u presupozua se do të ishin në poste të barazvlefshme me “ndihmësit ligkore”, do të punesohet për një periudhë 6-7 mujore, deri në Shkurt 2021 dhe do të paguhet nga USAID-i me një pagë mujore bruto 84 mijë lekë (rreth 65 mijë lekë neto).

Pikërisht, koha e shkurtër e kontratës dhe sidomos paga e ulët, krahasuar me ndihmësit ligjorë të emëruar sipas ligjit, e zbeh iniciativën e KLGJ-së dhe USAID-it, një marrëveshje, e cila gjithësesi ka probleme me kushtetutshmërinë dhe ligjshmërinë

Ndihmësit ligjorë në Gjykatën e Lartë ndahen në dy kategori;
⁃ Magjistratët (gjyqtarët) e shkallëve të para të komanduar në Gjykatën e Lartë, të cilët paguhen me pagë mujore rreth 190 mijë lekë të reja;
⁃ Ndihmësit ligjorë që rekrutohen me konkurs nga radhët e juristëve, me pagë mujore rreth 190 mijë lekë të reja.

“Trupa e juristëve të zotë”, që do të rekrutohet në bazë të Marrëveshjes KLGJ-USAID do të ketë një pagë shumë më të vogël se sa ndihmësit ligjorë aktualë.

LEXO EDHE  Hapja e kufijve Kosovë-Shqipëri, ende nuk ka një datë

Kur kjo marrëveshje e publikua për herë të parë nga ambasadorja e SHBA në Tiranë, Yuri Kim, shkaktoi emocione të ndryshme.

Kishte nga ata, të lodhur nga pritja e gjatë për vendime nga Gjykata e Lartë, të cilët e panë rekrutimin e një “trupe juristësh” të zotë si një dritë shprese për të përshpejtuar procedurat dhe shqyrtimin e çështjeve.

Kishte të tjerë, të cilët vendosën pikëpyetje mbi ligjshmërinë e një procesi të tillë, i cili anashkalonte procedurat formale për emërimin e ndihmësve ligjorë në Gjykatën e Lartë.

Por, publikimi i modaliteteve për rekrutimin e “trupës së juristëve të zotë” rrëzoi edhe pritshmëritë e larta, të krijuara pas deklaratave të ambasadores Kim, por edhe shqetësimet e skeptikëve.

“Trupa e juristëve të zotë”, të cilët “do të ndihmojnë në uljen e stokut të dosjeve në Gjykatën e Lartë”, janë, as më pak, as më shumë, asistentë administrativë ose, më thjesht, sekretarë.

Angazhimi i tyre konkret do të jetë sistemi i dosjeve në arkivën e tejmbushur të Gjykatës së Lartë.

Kjo është një punë, e ngjashme me atë që zhvillojnë në praktikën mesimore, çdo vit, studentët e Drejtësisë apo të Shkencave Sociale.

E, në këtë kontekst, duket e paqartë se cila është arsyeja që kjo iniciativë e USAID-it duhej të merrte përmasa kaq publicitare nga ana e Ambasadës Amerikane.

USAID-i ka ndërmarrë iniciativa shumë më të rëndësishme dhe produktive për sistemin e drejtësisë në Shqipëri, të cilat kanë marrë vlerësimet e duhura edhe pa një nxitje reklamuese.