Ëndrra për të bërë një karrierë ndërkombëtare është kthyer në një makth të vërtetë për futbollistin brazilian Vicente de Paula.
Lojtari i ekipit të Bylis-it në Kategorinë Superiore, ka rrëfyer historinë e tij të dhimbshme në Shqipëri duke folur me anë të një video transmetimi me një gazetar brazilian. Siç tregon vetë ai, mbrojtësi ka përjetuar një dramë në muajin shkurt, kur mamaja e tij humbi jetën dhe nuk fluturoi dot drejt Brazilit për të qenë në funeralin e saj.
“Nuk ka asnjë mënyrë për të shpjeguar ndjenjën, është diçka unike [humbja e nënës]. Sapo dëgjova, që nëna ime shkoi në spital, mjekët thanë se duhet të kthehem. Unë bisedova me presidentin e klubit dhe më tha që të mos kthehesha, pasi nuk do të më linte të lirë. Më premtoi se do të më mbështeste, por nuk e bëri” – tregon 24-vjeçari.
Mbrojtësi nuk është paguar prek katër muajsh, sikurse thuhet në artikull, ndërkohë që braziliani shton: “FSHF ka vendosur në dispozicion të lojtarëve 250 euro, por nuk ka asnjë mënyrë për të mbijetuar. Duhet t’i dërgojmë para familjes”.
Më tej lojtari i Bylisit pretendon se është mashtruar nga një menaxher.
“Menaxheri më kontaktoi, më bëri një ofertë dhe propozimi ishte i mirë. Pranova, por kur mbërrita në Shqipëri gjithçka ishte ndryshe. Më gënjeu. Është diçka e trishtueshme, sepse kemi ardhur këtu për të luajtur, për të përmirësuar jetën dhe tani jemi në këtë situatë. Ndjehem i dekurajuar dhe dua të kthehem në shtëpi”, mbyll Vicente.
