Kryebashkiaku i Tiranës, Erion Veliaj, ka akuzuar Presidentin Ilir Meta për lojën që ka bërë me Teatrin Kombëtar.
Veliaj tha për ABC news se Presidenti ose me qëllim, ose nga padija, iu drejtuar Gjykatës Kushtetuese dhe jo asaj Administrative, e cila do të shprehej me vendim brenda 1 ore.
“Pse ia çoi Kushtetueses, Presidenti kur kjo Gjykatë nuk e ka kompetencë? Nga padija apo me qëllim? Akti Administrativ, sikundër është një vendim i Këshillit të Ministrave, gjykohet nga Gjykata Admministrative”, tha Veliaj.
Duke iu përgjigjur mesazhit të Presidentit, i cili deklaroi se për atë që ndodhi më 17 maj nuk do të ketë amnisti, Veliaj tha se deklarimet e Metës në këto muaj kështu janë.
“E mbani mend vjet, tha se do të vepronte si Aldente. Duket se në muajt maj-qershor Meta bën deklarata të tilla”, tha Veliaj.
I pyetur sepse policia ndërhyri në orën 04:00 të 17 majit, Veliaj theksoi se në këtë kohë kontakti me njerëzit ishte edhe më i vogël.
“Shembja e Teatrit s´ka pikë lidhje me reformën zgjedhore. Unë bëj punën time, punojmë 24 orë në 24”, tha Veliaj.
