Hetimi Tatimor vitin e kaluar ka zbuluar evazion fiskal në masën e 10.7 miliardë lekëve ose rreth 87 milionë eurove në rreth 26 mijë kontrolle në terren.
Nga kjo shumë, pjesën më të madhe të dëmit në të ardhurat tatimore e zë evazioni fiskal me rreth 8,5 miliardë lekë, më tej mospagimi i taksave me vlerë 1,4 miliardë lekë, ndërsa skemat e mashtrimit me TVSH-së kanë krijuar një dëm prej 804 milionë lekësh.
Sipas burimeve zyrtare të Tatimeve, 284 subjektet e biznesit që kanë krijuar këtë evazion janë referuar në prokurori.
Nga rastet e hetuara mbi 1000 prej tyre janë denoncuar në portalin e-albania ose në adresat zyrtare të tatimeve.
Nga kontrollet 1,136 tatimpagues janë penalizuar për shkeljen e moslëshimit të kuponit tatimor. 598 tatimpagues janë penalizuar pasi janë konstatuar me punonjës të padeklaruar, nga të cilët 470 subjekte janë të përgjegjësisë tatimore “biznes i vogël” dhe 128 subjekte janë të përgjegjësisë tatimore “biznes i madh”.
233 tatimpagues janë konstatuar se nuk kanë pasur të instaluar pajisjet fiskale dhe 224 të tjerë nuk i mbanin pajisjet fiskale në gjendje pune, ndërsa 878 tatimpagues janë konstatuar se dispononin mallra pa dokumentacion tatimor.
Si pasojë e shkeljeve të konstatuara, 284 biznese janë referuar në prokurori, 657 subjekte janë bllokuar, 70 prej të cilave janë bllokuar për 30 ditë kalendarike për moslëshim kuponi tatimor, të kapura për herë të dytë. Ndërsa 587 subjekte janë konstatuar të paregjistruara në organet tatimore, për të cilët është marrë masa e bllokimit deri në momentin e regjistrimit të tyre pranë QKB dhe organeve tatimore.
Viti 2019-a u mbyll me të ardhura totale prej 460.3 miliardë lekësh, ose 3.7 miliardë eurosh. Në krahasim me planin, buxheti ishte minus me 26.3 miliardë lekë, nga të cilat 6.3 miliardë lekë nga ndihmat dhe 22 miliardë lekë, ose rreth 180 milionë euro nga të ardhurat e planifikuara tatimore. Sipas të dhënave historike, ky është niveli më i lartë i mosrealizimit të planit të të ardhurave tatimore, të paktën që nga viti 2009, kur raportohen të dhënat faktike dhe të planit. TVSH-ja, zëri që sjell më shumë të ardhura në buxhet, kishte dhe mosrealizimin më të madh të planit, me -19 miliardë lekë. /Monitor/
