Kreu demokrat Lulzim Basha shprehu mbështetje për artistët që mbrojnë Teatrin Kombëtar.
Ndërsa e konsideroi si një aferë korruptive, Basha tha se Edi Rama në kohën e pandemisë merr vendimin për të shembur godinën, pasi e ka mendjen vetëm për të vjedhur.
“Aktorët dhe artistët nuk po mbrojnë një gjë të tyre, por një Teatër që I takon gjithë qytetarëve.
Akti për të shëmbur Teatrin Kombëtar është një akt lufte me qytetarët, ndaj I bëj thirrje çdo qytetari që të jetë në krah të artistëve dhe aktorëve.
Kjo është vija e kuqe dhe nëse do të ndezin zjarrin te Teatri le ta presin zjarrin nga Surreli, te institucionet e zaptuara dhe te qendrat tregtare të oligarkëve.
Kjo është thirrja ime për çdo demokrat, për çdo socialist që kjo qeveri e ka lënë pa ndihmë në këtë kohë pandemie”, tha Basha.
Kreu demokrat i bëri këto deklarata pas një takimi që pati në selinë e PD-së me një përfaqësi të Aleancës për Mbrojtjen e Teatrit, mes të cilëve edhe aktorit Neritan Liçaj dhe regjisorit Edmond Budina.
