Ka ndërruar jetë 6-vjeçarja që prej disa ditësh po trajtohej në Pediatrinë e Tiranës, pasi u plagos rëndë nga zjarri që përfshiu banesën e familjes së saj në Maliq.
Ngjarja e rëndë ndodhi disa ditë më parë, kur flakët shkrumbuan banesën, duke u marrë jetën edhe nënës së vajzës, Rrahime Hazisllari, dhe vëllait të saj, Luka Hazisllari.
Nefeli kishte djegie në rreth 45% të trupit, kryesisht në fytyrë dhe duar, dhe përpjekjet e mjekëve për ta shpëtuar nuk dhanë rezultat.
Ngjarja ndodhi rreth orës 13:30 të datës 19 tetor, në bllokun numër 3 të qytetit të Maliqit. Fillimisht, zjarri ka shpërthyer në ambientet e kuzhinës, ndërsa flakët janë përhapur me shpejtësi në pjesët e tjera të banesës.
Në momentin e ndërhyrjes, zjarrfikësit kanë gjetur jashtë shtëpisë Luka Hazisllarin, 14 vjeç, në gjendje kome, dhe motrën e tij, Nefeli Hazisllari, 6 vjeçe, në gjendje të vetëdijshme. Ndërkohë, nëna e tyre, Merjeme Hazisllari, rreth 40 vjeçe, është gjetur pa shenja jete pranë derës së kuzhinës, pasi ishte asfiksuar nga tymi.
Të miturve u është dhënë ndihma e parë në vendngjarje dhe më pas janë transportuar me urgjencë në spitalin e Korçës. 14-vjeçari nuk arriti t’u mbijetojë plagëve, ndërsa e motra, për shkak të gjendjes së rëndë, u dërgua në Tiranë për mjekim të specializuar, por fatkeqësisht ndërroi jetë pas disa ditësh.
Sipas hetimeve paraprake, shkak i zjarrit dyshohet të ketë qenë një sobë druri e vendosur pranë një dysheku, e cila ka marrë flakë duke përfshirë me shpejtësi gjithë banesën.
