Kryebashkiaku i Tiranës, Erion Veliaj, vijon të provokojë lidhur me Teatrin Kombëtar. Sot pasdite, efektivë të policisë bashkiake janë shfaqur te Teatri Kombëtar me pretendimin se do të marrin në dorëzim objektin, referuar vendimit të Qeverisë.
“Në bazë të vendimit nr 15 3037 /1 të datës 12,.5 2020 për marrien në dorëzim të pasurisë 1/ 241 ZK 5380, Teatri Kombëtar.
Inspektori Elton Dermishi, prezent edhe inspektori Kujtim Llapaj”, shkruhet në shkresën e vendosur në derën e TK-së.
Në videon e bërë publike nga Aleanca për Mbrojtjen e Teatrit, thuhet se policë bashkiake po tentojnë të marrin godinën, e cila prej dy vitesh është marrë në mbrojtje nga pjesëtarë të shoqërisë civile dhe artistët, duke e mbrojtur nga një plan i Qeverisë Rama dhe Kreut të Bashkisë, Veliaj, që synojnë shembjen e godinës ekzistuese.
Një ditë më parë Erion Veliaj deklaroi publikisht se Teatri i ri Kombëtar do të ndërtohet duke marrë një kredi bankare, por nuk dha detaje sa do të jetë vlera apo kredia që do të merret dhe do të shlyhet me taksat e qytetarëve të Tiranës.
