Katër raste të reja me COVID janë shënuar në 24 orët e fundit në vend në 246 testime të kryera, ndërkohë është ulur në 161 numri i të prekurve aktivë. Rastet e reja janë 2 në Tiranë e 2 në Berat, mes tyre një grua shtatzënë.
Në total, numri i personave që janë prekur me koronavirus në vend që nga fillimi i pandemisë është 880. Nga këta 78 përqind janë shëruar, ndërsa 31 persona kanë humbur jetën.
Në dy spitalet COVID janë të shtruar 21 pacientë, 1 prej të cilëve është në terapi intensive.
Bilancin e përditësuar e njoftoi Flutra Beqo nga Ministria e Shëndetësisë dhe Mbrojtjes Sociale, e cila bëri apel për ruajtjen e distancimit social.
Bilanci
“Në 24 orët të fundit janë testuar 246 qytetarë të dyshuar si të prekur me Covid-19. Vijon pozitiviteti i ulët nën 2%, në raport me testimet ditore. Në 24 orët e fundit, kanë rezultuar pozitivë 4 qytetarë, përkatësisht 2 në Berat dhe 2 në Tiranë, mes të cilave një grua shtatzanë. Ndërsa të shëruar janë 6 qytetarë. Deri më sot janë konfirmuar pozitivë me COVID-19 në të gjithë vendin 880 qytetarë, 78 % e të cilëve janë shëruar. Në të gjithë vendin aktualisht janë 161 persona aktivë me COVID19, kryesisht ne Tiranë, Krujë, Shkodër. Situata në spitale paraqitet e qëndrueshme prej ditësh. Aktualisht në dy spitalet COVID janë të shtruar 21 pacientë dhe vetëm 1 prej tyre është në terapi intensive. Nga fillimi i epidemisë, deri tani, në vendin tonë janë kryer 11578 testime, nga të cilat, 11,048 janë testime molekulare dhe 530 janë testime serologjike”, tha Beqo.
Apeli
“Pavarësisht situatës së përmirësuar, Ministria e Shëndetësisë dhe Mbrojtjes Sociale thekson se është shumë e rëndësishme që qytetarët të ruajnë distancimin fizik dhe higjienën personale; bizneset të zbatojnë protokollet e sigurisë për të ruajtur shëndetin e qytetarëve. Qytetarët duhet të jenë të kujdesshëm të mos neglizhojnë shenjat e sëmundjes Covid-19, ndaj ju lutemi telefoni në numrin unik të Urgjencës Kombëtare, 127.
Për informacion në lidhje me COVID19, për këshillim psikologjik në rast të shfaqjes së shenjave të ankthit apo shqetësime të tjera, ju lutemi, telefononi në linjën e gjelbër 0800 40-40″, shtoi.
Shpërndarja e rasteve aktive:
Numri më i lartë i rasteve aktive është në kryeqytet me 70 të prekur, pasuar nga Kruja dhe Shkodra:
Tiranë 70
Krujë 49
Shkodër 16
Kamëz 12
Fier 5
Berat 3
Elbasan 2
Kurbin 1
Mirditë 1
Durrës 1
Korçë 1
https://www.facebook.com/OgertaManastirliu/videos/2352633981703904/?v=2352633981703904&external_log_id=83432c58ce9c6836c88964212921a8a2
