Kryebashkiaku i Tiranës, Erion Veliaj, tha mbrëmjen e sotme se plani A për ndërtimin e Teatrit Kombëtar ishte ai që ta ndërtonte private, plani B është që ta ndërtojmë me paratë tona, që nuk i kemi, dhe plani C është që ta ndërtojmë me kredi.
Veliaj tha se skema për ta ndërtuar me privat ra, sepse artistët kërkuan më shumë, duke përfshirë edhe impiante.
“Bashkia e Tiranës e mori në pronësi truallin e Teatrit, pasi ky është kusht që ne të kemi mundësi të investojmë aty. Godina e re do të nisë nga zero, pra bëhet fjalë për një ndërtesë të re”, tha Veliaj.
Në emisionin “Open”, Veliaj tha se nuk mund të bëhej një investim publik, nëse në letra nuk rezulton që kjo pronë është e Bashkisë së Tiranës.
“Ne do aplikojmë për kredi, do veprohet njëlloj si me kreditë që marrim për banesat sociale”, tha Veliaj.
Sipas tij, Bashkia e Tiranës nuk po ndërton teatër për veten e saj, por për qytetarët.
“Patjetër që me taksat e qytetarëve do të paguhet kjo kredi, por kini parasysh që 70 % e taksave të bashkisë vijnë nga 1 % që janë ndërtuesit, biznesmenët”, tha Veliaj.
Ai tha se puna për Teatrin nuk nis këtë vit, pasi duhen disa muaj për projektin dhe pastaj do nisim negociatat me bankat.
Veliaj nuk tha se sa do të ishte vlera e Teatrit të ri Kombëtar apo kredia që do të kërkohej nga bankat.
