Epidemiologu Ilir Alimehmeti përmes një postimi në rrjetet sociale, lidhur edhe nga ndarja që Komiteti Teknik i bën bashkive në zona të kuqe dhe të gjelbra për shkak të rasteve të koronavirusit, shprehet se në Shqipëri s´mund të ketë zona të kuqe.
Për këtë, Alimehmeti i referohet Gjermanisë, ku zonë e kuqe përcaktohet ajo ku duhet të kesh të paktën 50 raste në javë për 100 mijë banorë.
“Po përdor indikatorin e Gjermanisë, pasi për Shqipërinë nuk është bërë publik informacioni mbi indikatorin e përdorur për të caktuar një bashki të kuqe apo të gjelbër.
Asnjë nga bashkitë e Shqipërisë nuk i përmbush këto kushte, pra të gjitha bashkitë duhet të jenë të gjelbra”, shkruan Alimehmeti.
Reagimi nga Ilir Alimehmeti
“Të gjelbër” apo “të kuq”, kjo është çështja!
Sipas vendimit normativ të Gjermanisë, që të shënohesh “zonë e kuqe” do të thotë të kesh të paktën 50 raste të reja për 100.000 banorë në një javë!
-Po përdor indikatorin e Gjermanisë, pasi për Shqipërinë nuk është bërë publik informacioni mbi indikatorin e përdorur për të caktuar një bashki të kuqe apo të gjelbër.
-Asnjë nga bashkitë e Shqipërisë nuk i përmbush këto kushte, pra të gjitha bashkitë duhet të jenë të gjelbra.
Nisur nga numri i banoreve, numri minimal i rasteve për “bashkitë e kuqe” është:
-Tirana: duhen 247 raste/javë dhe ka 21 raste (8.5%).
-Kamza: duhen 52 raste/javë dhe ka 9 raste (17.3%).
-Shkodra: duhen 100 raste/javë dhe ka 6 raste (6.0%).
-Fieri: duhen 145 raste/javë dhe ka 5 raste (3.4%).
-Kruja: duhen 30 raste/javë dhe ka 14 raste (46.7%). Kujdes këtu!
Bashkitë e çuditshme të kuqe:
-Durrësi: duhen 88 raste/javë dhe nuk ka asnjë rast (0%).
-Kurbini: duhen 23 raste/javë dhe nuk ka asnjë rast (0%).
Ndër bashkitë e gjelbra:
-Berati: duhen 61 raste/jave dhe ka 1 rast (1.6%).
Kjo është situata e javës 06-12 Maj 2020.
Megjithatë, asnjë nga bashkitë e mëdha nuk duket të jetë afër pragut kritik.
Lirimi i masave po shoqërohet me mosrritje të rasteve të reja!
Ky është një lajm shumë i mirë!
Koment: situata është dinamike dhe si e tillë duhet trajtuar.
