Ministria e Financave dhe Ekonomisë do të rimbursojë interesat e kredive që do të jepen në bazë të garancisë sovrane për bizneset që janë në vështirësi financiare për të paguar punonjësit.
Fondi prej 100 milion dollarësh është pjesë e paketës së parë financiare dhe parashikon dhënien e kredive të buta me interesa deri në 2.85% për të gjitha subjektet që nuk kanë mundësi pagese për pagat.
Në fletoren zyrtare është miratuar një shtesë në vendim, ku parashikohet se Ministria e Financave dhe Ekonomisë do të marrë përsipër të paguajë interesat e kredive që bizneset do të marrin.
Banka e Shqipërisë bëri me dije disa ditë më parë se deri më tani kanë aplikuar 70 biznese për të përfituar nga kjo kredi ndërsa vlera e kërkuara arrin në 1 miliardë lekë.
Nga kjo kredi nuk mund të përfitojnë bizneset që kanë probleme me shlyerjen e huave të mëparshme.
Garancia e dytë sovrane prej 150 milion dollarësh ende nuk është bërë aktive dhe pritet të miratohet vendimi në bazë të cilit do të veprohet.
