Policia italiane sekuestroi 34 kilogram heroinë dhe kokainë me vlerë 2 milionë euro, ndërsa ka vënë në pranga dy shqiptarë.
Mediat italiane raportojnë se policia ra në gjurmët e tyre, pasi shpërndarësi bëri një gabim, duke çuar policinë në gjurmët e shqiptarëve.
Autoritetet vunë në pranga dy shtetas shqiptar nën akuzën e trafikimit të lëndëve narkotike.
Të arrestuarit janë Alfred Tusha 29 vjeçar dhe Leonard Spahiu 44 vjeç, që iu kapën 34 kg drogë të tipit heroinë dhe kokainë.
Dy thasë me 25 kg heroinë dhe 5 kilogramë kokainë u gjetën në banesën e tyre të fshehur në një dollap ku ishte e ndarë në pako gjysmë kilogramëshe.
Pjesa tjetër, e ndarë në tre pako, u gjet e fshehur nën tavolinën e kuzhinës.
Në deklaratën për mediat është bërë e ditur se janë sekuestruar edhe disa kg lëndë përzierëse për përgatitjen e dozave të heroinës.
Rrjeti i trafikantëve është zbuluar nga një shpërndarës i cili ishte identifikuar nga policia. Gjatë gjurmimit të tij mbrëmjen e së premtes është konstatuar takimi me dy shqiptarët.
Pas një bisede ata janë nisur në Montesilvano ku kanë hyrë dhe në një apartament.
Forcat e rendit kanë ndërhyrë sapo prej ndërtesës ka dalë një prej trafikantëve të cilit i është gjetur dhe një pako me heroinë.
Menjëherë është ushtruar kontroll dhe në banesë ku është gjetur dhe sasia tjetër.
