Klubi i Lyonit kërkon që të ndryshohet vendimi për pezullimin e sezonit në Francë për shkak të pandemisë COVID-19.
Ky është një qëndrim zyrtar i skuadrës franceze, të cilët nuk kanë mundur të kualifikohen as në Champions League dhe as në Europa League, pasi në momentin e ndërprerjes së kampionatit pozicionoheshin në vendin e 7-të.
“Si mund të garantojmë që të gjitha klubet franceze do të jenë në gjendje ta përfundojnë sezonin pa dështuar? Si mund të konkurrojmë me kundërshtarët tanë të jashtëm, që në maxhorancë kanë vendosur të rinisin kampionatet e tyre? Si do të mund ta ngushtojmë hendekun mes futbollit francez dhe kampionateve të vendeve të mëdha në Europë?”
Presidenti i Lyonit, Jean-Michel Aulas, prej disa javësh po polemizon kundër vendimit të drejtuesve të futbollit francez për të ndërprerë sezonin, me arsyetimin e shmangies së rreziqeve mbi shëndetin, që mund të shkaktojë pandemia COVID-19.
Ligue 1 është i vetmi ndër kampionatet kryesore, që ka vendosur të mos rinisë. Bundesliga do të rifillojë me 16 maj, ndërsa Premier League, La Liga parashikojnë të caktojnë së shpejti një datë për kthimin në fushë. Ndërsa situata për Seria A paraqitet me shumë pengesa.
