Ish-deputeti socialist, Koço Kokëdhima, kryetar i partisë Zgjidhja, ka dënuar dhunën policore të përdorur të shtunën ndaj qytetarëve që protestuan kundër masave ekstreme të izolimit.
Gjithashtu Kokëdhima dënoi vendimin e fundit për pronësinë e Teatrit Kombëtar.
Përmes një deklarate, Kokëdhima u bën thirrje qytetarëve shqiptarë dhe vendeve anëtare të BE-së që të shtojnë presionin ndaj qeverisë.
“Marrja zvarrë dhe ndalimi i protestuesve paqësorë që po kremtonin 9 majin, Ditën e Europës, dhe po protestonin për rrëmbimin e Teatrit Kombëtar nga mafia e betonit është një ngjarje e turpshme dhe një provë tjetër e rrënimit të vlerave demokratike që ka pësuar vendi nga pushteti autokratik i një grushti të korruptuarish.
Ne dënojmë me forcë dhunën e ushtruar mbi demonstruesit dhe degradimin e ëndrrës europiane të popullit shqiptar nga kjo elitë politike.
‘Zgjidhja’ u bën thirrje qytetarëve shqiptarë dhe vendeve anëtare të BE-së që të shtojnë presionin demokratik ndaj qeverisë, për demokratizimin e Shqipërisë dhe rivendosjen e lirive republikane”, thuhet në deklaratë.
