Prej ditësh ka një përballje faktesh mbi kohën se kur koronavirusi ka qenë prezent në Shqipëri. Mjku imazherist Renato Osmënaj dhe mjeku i njohur Gëzim Xhepa kanë publikuar në rrjetet sociale imazhe pulmore të pacientëve që kanë qenë shtruar në spitale në janar-shkurt, që sipas tyre tregojnë qartazi përhapjen e Covid-19 disa javë përpara atij që konsiderohet zyrtarisht si rasti “0”.
Pavarësisht provave dhe fakteve që janë publikuar, Komiteti Teknik i drejtuar nga zv.ministrja e Shëndetësisë Mira Rakacolli vijon t´i qëndrojë tezës se koronavirusi është shfaqur në mars, kohë kur Qeveria nisi edhe aplikimin e masave izoluese me pretendimin se do të mbronin popullatën nga “armiku i padukshëm”.
Mes dy qëndrimeve, atij që argumentohet me imazhe pulmore, dhe tjetrit që flet për testime të bëra në atë kohë, pra janar-shkurt, është edhe një qëndrim mjekësh të infektivit, që lënë të hapur mundësinë që koronavirusi të ketë hyrë në Shqipëri në javën e fundit të shkurtit, ose në dy javët e fundit të këtij muaji.
Kurba e prezantuar zyrtarisht nga ISHP dhe Ministria e Shëndetësisë për ecurinë e koronavirusit në vendin tonë ka formën e një sharre, e pangjashme me asnjë prej kurbave të çdo vendi të prekur nga Covid-19.
Ministria e Shëndetësisë ka sqaruar se kjo kurbë ka këtë formë për shkak të masave që janë marrë nga Qeveria.
Por së fundmi është publikuar një tjetër kurbë, bazuar në imazhet pulmonare, që tregojnë se kurba e koronavirusit në Shqipëri ka qenë në muajin janar, vala e dytë në mars dhe bishti i epidemisë është në vazhdim.
Me shumë gjasa edhe kjo kurbë do të kundërshtohet nga Komiteti Teknik, që me logjikën e thjeshtë nuk mund të pranojë përhapjen e epidemisë në muajin janar apo edhe më herët, në dhjetor të 2019, pasi kjo do të rrëzonte gjithë masat ekstreme të ndërmarra nga Qeveria.
OBSH, një organizatë që i referohet shpesh ISHP, ka kërkuar që të analizohen rastet e hershme të pneumonve, ndërsa në shumë vende europiane të prekura nga pandemia, janë zbuluar rastet e qarkullimit të Covid-19 që në nëntor dhe dhjetor të 2019.
