Ish-kryeministri Sali Berisha mohon të ketë një afrim mes Kryeministrit Edi Rama dhe Presidentit Ilir Meta.
Sipas tij, Rama e ka shfrytëzuar angazhimin e Presidentit për të kontribuar sado pak në këtë pandemi.
I ftuar në emisionin “Kjo Javë” ne News 24, ish-kryeministri Berisha është shprehur se Rama ka bërë të njëjtën edhe me liderin e opozitës, Lulzim Basha pas mbledhjes së Parë të Këshillit të Sigurisë Kombëtare.
“Në këndvështrimin tim epidemia në vetvete përbën një lloj momenti për përqendrim total në kapërcimin e saj.
Presidenti i Republikës është përpjekur me dy mbledhje të Këshillit të Sigurisë Kombëtare që të luajë një rol për përballimin e suksesshëm të kësaj situate.
Unë gjykoj se Edi Rama e ka keqshfrytëzuar për pushtetetin e tij dhe këtë nuk ka shqiptar opozitar që nuk e ka të qartë.
U bë Mbledhja e Këshillit të Sigurisë Kombëtare, njerëzit thanë po mirë,u diskutua për hallet tona, kurse Rama të nesërmen në një mënyrë ordinere i çoi spotin Bashës për t’i treguar mbështetësve të tij se për mua është një hiçgjë, ndaj them se jemi përballë qëllimeve primitive”, tha Berisha.
