Kryetari i Partisë Demokratike, Lulzim Basha akuzoi se Ministria e Shëndetësisë po fsheh dhe shkatërron provat për të mbuluar shkeljet ligjore me tenderat.
Pas akuzave të PD-së se Ministria e Shëndetësisë po abuzon me tenderat gjatë kohës së pandemisë, SPAK ka njoftuar nisjen e hetimeve. Në një komunikimin me gazetarët nga selia blu këtë të Shtunë, Basha tha se së fundmi, një zjarr ka rënë në Zyrën e Prokurimeve në Ministrinë e Shëndetësisë, duke aluduar se ngjarja ka qenë e qëllimshme për të zhdukur provat që mund të zbulojnë paligjshmërinë me tenderat.
“Paska rënë zjarri në një nga katet e Ministrisë së Shëndetësisë, te Zyra e Prokurimeve. Kam paralajmëruar prej kohësh që Rama nuk po i bën publik tenderat sepse po manipulon të dhënat. Uroj të kenë mbetur mjaftueshëm gjurmë që SPAK të kryejë hetimet”, tha Basha.
Krei i PD i bëri apel Prokurorisë Speciale të hetojë abuzimet me tenderat, që sipas tij, janë të shumta. Basha përsëriti se kjo është prova “e madhe” e SPAK. Nëse dështon, tha Basha, atëherë SPAK ka lindur i vdekur.
