Partia Demokratike ka reaguar pas njoftimit të policisë për procedimin penal të 7 protestuesve të djeshëm në Tiranë, të cilët kërkuan heqjen e masave kufizuese.
Pas shoqërimeve të dhunshme të djeshme të policisë dhe procedimeve të njoftuara këtë të Premte, PD shprehet se “dënon me ashpërsi përndjekjen e qytetarëve që kërkojnë kthimin e të drejtave kushtetuese, të kufizuara padrejtësisht kaq gjatë nga qeveria”.
“Ngritja e zërit nga disa aktivistë, që nuk pajtohen me vendimet antikushtetuese të parlamentit ilegjitim për zgjatjen e gjendjes së jashtëzakonshme, është garanci për themelin e çdo shoqërie demokratike. Urdhrat e Edi Ramës për të përndjekur kundërshtarët e vendimeve të tij antikushtetuese e shndërrojnë Shqipërinë nga një vend kandidat për Bashkimin Europian në një vend që drejtohet prej një regjimi dhe kryeministër autoritarist”, thuhet në një njoftim të zyrës së shtypit të Partisë Demokartike.
“Sot, qytetarëve po u cenohen të drejtat me lehtësi nga regjimi i Edi Ramës, sepse kryeministri anti-shtet po pengon ngritjen e Gjykatës Kushtetuese, me qëllim kontrollin politik të saj. Partia Demokratike është në krah të çdo qytetari që ngre zërin për liritë dhe të drejtat, që ngre zërin për shëndetin dhe punën e tij. Asnjë vendim antikushtetues nuk mund të bëjë që Edi Rama të marrë shqiptarët peng dhe të zëvendësojë demokracinë me regjimet autoritariste”, mbyllet reagimi.
Policia akuzon protestuesit për veprat penale “Prishja e rendit dhe qetësisë publike” dhe “Organizimi dhe pjesëmarrja në tubime të paligjshme”. Lidhur me rastin reagoi dhe nga personat e proceduar penalisht, profesori Sazan Guri, i cili argumenton pse sipas tij, Policia po vepron në mënyrë të kundërligjshme me protestuesit dhe pse mbyllja e qytetarëve është e paligjshme.
