Presidenti Ilir Meta dhe Kryeministri Edi Rama shprehën sot ngushëllimet për ndarjen nga jeta të arkitektit të njohur, Maks Velo.
Meta e ka cilësuar një lajm të trishtueshëm për një figurat më inovatore të artit shqiptar, simbol të antikonformizmit dhe lirisë së mendimit.
“Si një prej figurave më novatore të artit shqiptar, simbol i antikonformizmit dhe lirisë së mendimit, piktor e arkitekt i shquar që luftonte pakompromis transformimet e shfrenuara urbane, intelektual aktiv që jetoi dy epoka duke provuar vuajtjet e burgjeve të diktaturës, shkrimtar e studiues i njohur, kjo ikje e Tij le pas një boshllëk të pazëvendësueshëm në shoqërinë shqiptare.
Ngushëllime të afërmve, bashkëpunëtorëve, miqve e dashamirësve të shumtë!
Maks Velo dhe zëri i Tij kritik do t’i mungojë në veçanti mbrojtjes së interesit publik në këtë periudhë të brishtë institucionale dhe demokratike”, shkruan Meta në mesazhin e tij.
Ndërsa, Kryeministri Rama shkruan “çfarë trishtimi. Lamtumirë Maks”.
Raportes mes Velos dhe Ramës ishin tensionuar ndjeshëm në vitet e fundit, ndërsa arkitekti kishte artikuluar akuza të forta ndaj Kryeministrit.
“Pashë që ai të përdor. Ai do të thuash atë që do ai. Unë këtë e kuptova, dhe çdo njeri që nuk është dakord me atë, duhet të largohet. Rasti i Teatrit është gjëja me katastrofike. Nuk është larg shtatori dhe do shihni se çfarë katastrofe është stadiumi ‘Qemal Stafa’, një katastrofë e pariparueshme.
Të marrësh një stadium ta bësh qendër tregtare, hoteliere, me një stadium të vogël ku kjo pjesa vjen 80% të investimit, dhe ky të ishte stadiumi kombëtar i yni, dhe të eliminosh pistën olimpike. Nuk kemi një pistë olimpike, e zhduku Rama. Si është e mundur që ky njeri sportist zhduk pistën e atletikës për ta bërë dyqane. U mbush me dyqane. Ne jemi gati të vjedhim çdo gjë. Edhe ajrin”, është shprehur Velo mbi 1 vit më parë lidhur me Ramën.
