Kryeministri në detyrë i Kosovës, Albin Kurti, akuzoi Presidentin Hashim Thaçi se ka krijuar një lidhje me shkurtër me homologun e tij serb, Aleksandar Vuçiç.
Kurti tha se të dy Presidentët kanë përdorur Ambasadorin amerikan Grenell.
“Për herë të parë kemi një politikan në Kosovë që ka lidhje të drejtpërdrejta, pa nevojën e ndërmjetësuesve me Vuçiç. Grenell po tenton arritjen e një marrëveshjeje historike, por ajo s’mund të arrihet pa histori”, tha Kurti.
Në emisionin “Opinion”, Kurti theksoi se Kushtetuta e Kosovës parashikon edhe krimin e tradhëtisë.
“Duhet të ketë dialog për marrëveshje dhe jo e kundërta, duhet të ketë dialog pa harta. Kosova nuk ndahet dot, dhe nga 6 tetori populli i Kosovës është ndarë nga politikanët që rrinë me thika mbi harta”, tha Kurti.
I pyetur për bisedimet sekrete mes Thaçit dhe Vuçiç, Kurti tha se “ka një marrëveshje që Kosova hiqte dorë nga komunat në veri të lumit Ibër, mund të fitonte edhe ndonjë komunë me shumicë serbe, Kosova do të merrte disa fshatra në Luginën e Preshevës, por jo Bujanovcin dhe Preshevën”.
“Është një marrëveshje sekrete, një këshilltar i Presidentit të Kosovës, ka biseduar me një nga bashkëpunëtorët e afërt të mi, dhe i ka treguar këto detaje që thashë unë. Nuk besoj se janë marrë vesh për të gjitha hollësitë”, tha Kurti.
