Një studim gjenetik i mostrave të më shumë se 7.500 personave të infektuar me COVID-19 ka treguar se koronavirusi i ri është përhapur me shpejtësi përreth botës, pasi të jetë shfaqur në Kinë dikur ndërmjet tetorit dhe dhjetorit të vitit të shkuar, kanë thënë të mërkurën shkencëtarët.
Shkencëtarë të Institutit për Gjenetikë në Universitetin londinez College kanë bërë të ditur se koronavirusi i ri – SARS-CpV-2 – ka pësuar pothuajse 200 mutacione gjenetike dhe kjo gjë, sipas shkencëtarëve, ka treguar se si është adoptuar ai në trupat e njerëzve gjatë përhapjes.
“Përllogaritjet gjenetike e mbështesin faktin se pandemia e COVID-19 ka nisur dikur nga 6 tetori deri në 11 dhjetor të 2019-s, gjë kjo që korrespondon me kohën kur ka kaluar te njerëzit”, ka thënë ekipi i shkencëtarëve, i drejtuar prej Francois Balloux.
Balloux ka thënë se analizat kanë treguar që virusi është duke pësuar mutacion, siç ndodh rëndom me viruset dhe se një hise e madhe e diversitetit gjenetik global të virusit që e shkaktoi COVID-19 është gjetur në të gjitha vendet e goditura më së rëndi.
Kjo gjë sugjeron se SARS-CoV-2 është bartur gjerësisht përreth botës që në fazat e hershme të epidemisë, ka thënë ai.
“Të gjitha viruset natyrshëm pësojnë mutacion. Mutacionet në vetvete nuk janë gjë e keqe dhe nuk ka aktualisht asgjë që mund të sugjerojë se SARS-CoV-2 po pëson mutacion më shpejt apo më ngadalë sesa që pritet”, ka thënë ai. “Deri më tani nuk mund të themi nëse SARS-CoV-2 po bëhet më shumë apo më pak vdekjeprurës apo bartës”.
Në një studim të dytë të publikuar të mërkurën, shkencëtarët nga Universiteti britanik i Glasgowit, i cili po ashtu analizoi mostrat e virusit SARS-CoV-2, ka treguar se punimet e mëhershme që kanë sugjeruar se kanë qenë dy flukse të ndryshme kanë qenë të pasaktë.
Një studim preliminar i shkencëtarëve kinezë në mars kishte sugjeruar se kanë qenë dy flukse të koronavirusit të ri që kanë shkaktuar infeksione, me ç’rast njëra ka qenë më “agresive” sesa tjetra. Por, me rastin e publikimit të analizës së tyre në revistën “Virus Evolution”, ekipi nga Glasgow ka bërë të ditur se ka qarkulluar vetëm një lloj i virusit.
E këto studime gjenetike ofrojnë një pasqyrë “fascinuese” mbi evoluimin e virusit dhe nënkuptojnë se virusi është “një cak në lëvizje me destinacion evolucionar të panjohur”, ka thënë Jonathan Stoye, shef i divizionit për virologji në institutin britanik “Francis Crick”.
“Të gjitha dëshmitë janë plotësisht konsistente me origjinën e tij nga fundi i vitit të shkuar dhe nuk ka arsye për ta kontestuar këtë gjë në asnjë mënyrë”, ka thënë Stoye.
Një studim i shkencëtarëve francezë, publikuar gjatë kësaj jave, ka treguar se një burrë në Francë ishte infektuar me COVID-19 para 27 dhjetorit, afro një muaj para se autoritetet t’i konfirmonin rastet e para. Organizata Botërore e Shëndetësisë ka njoftuar se rasti francez “nuk përbën befasi” dhe ka nxitur vendet që të hulumtojnë për raste të dyshuara të mëhershme. \ (Reuters)
