Kryeministri Edi Rama edhe këtë herë heq përgjegjësinë nga vetja për faktin e raportuar nga “Freedom House”. Sipas raportit, Shqipëria edhe këtë vit është në kategorinë e regjimeve hibride/demokraci në tranzicion, dhe shënoi rënie në qeverisjen demokratike dhe procesin zgjedhor.
“Nga Tirana në Tbilisi, ata që janë në pushtet, nuk janë të interesuar që ta bëjnë parlamentin një vend ku diskutohet. Në fakt, ata janë gjithnjë e më pak të interesuar për diskutim”, thuhet në raport.
Më herët, Presidenti Ilir Meta u shpreh “shumë i shqetësuar” për atë çka konsiston raporti dhe bën thirrje për përgjegjësi.
Por, kryeministri Edi Rama, ashtu siç bën rëndom, edhe këtë herë ia hedh fajin opozitës për këtë fakt.
“Po, e vërtetë, kemi rënë me një pikë krahasuar me vjet dhe mund të kishim rënë edhe më shumë nëse klima e zjarrtë politike do të kishte djegur largqoftë vendin, siç ishte plani i dështuar i trazirave të vjetshme, të cilat u projektuan për t’i vënë zjarrin Shqipërisë dhe dogjën opozitën”, shprehet Rama në një reagim në rrjetet sociale.
