Kryeministri Edi Rama, i ftuar në emisionin e mëngjesit në “ABC News” me gazetarin Enkel Demi, ka folur dhe rreth karantinës dhe masave të marra nga qeveria. Por Rama nuk i ka dhënë një përgjigje pyetjes: Ka hyrë që në janar në Shqipëri Covid-19?
Enkel Demi: Koronavirusi thuhet se ka hyrë që në janar, a nuk e nxjerr karantinën jashtë loje?
Edi Rama: Në dijeninë time ju nuk jeni epidemiolog. Unë jo e jo. Ju i merrni përsipër të gjitha temat. Unë jo. Këto janë debate për shkencëtarët. Nuk janë për ne të dy. Ajo që mund të diskutojmë ne të dy është për punën time.
Enkel Demi: Ju parashikoni shifra?
Edi Rama: Jo jo unë nxjerr atë që thonë ekspertët. Ju mediat, unë jo.
Mjekë në spitalet shtetërore në Tiranë janë shprehur se ka prova që pacientë të shtruar në spitale, kanë qenë të infektuar me COVID. Ndërkohë autoritetet kanë njoftuar rastet e para në muajin Mars.
I pyetur nëse ka gjasa që karantina të zgjasë deri në vigjilje të zgjedhjeve të ardhshme, Rama u shpreh ne nuk do të ketë një normalitet si ai para vitit 2019 deri në krijimin e një vaksinë.
Edi Rama: Nuk ka gjasa të jetojmë si normalisht derisa të dalë vaksina. Deri atëherë ky armik i padukshem do të jetë mes nesh. Duhet te adoptojmë një sjellje të ndryshme nga ajo e para. Por nuk a gjasë të vazhdojmë me masa shtrënguese deri kur të dalë vaksina. Duhet që secili prej nesh të jetë roja i vetvetes. Do të jetë një normalitet i ri.
Ndërsa, i pyetur nëse do të kemi një vaksinë së shpejti, Rama sërish u shpreh se nuk preferon t’ju hyjë këtyre temave.
Enkel Demi: Mjekët që erdhën nga Italia u karantinuan në kushte shtëpie, pse të tjerët që vinë nga shtete të tjera duhet të karantinohen në hotele?
Edi Rama: Më gjeni të pa përgatitur. Nuk e di, mbase keni të drejtë. Që t’u jap përgjigje më duhet të jem i informuar. Di që janë testuar dhe kanë dalë negativë, para se të vinin.
Kryeministri shtoi gjithashtu se do vazhdojmë të jemi në “luftë” deri sa të dalë vaksina.
