Mirel Josa, trajneri i mirënjohur shqiptar, së fundmi ka dhënë një intervistë ku ka folur për gjendjen që ka krijuar coronavirusi, për planet e tij në aspektin profesional dhe për skuadrën e Tiranës.
Aktualisht pa ndonjë skuadër në drejtim, 56-vjeçari ka deklaruar për “FanZone” në Supersport, se këtë periudhë pandemie ai po e kalon në shtëpinë e tij në Tiranë dhe thekson se tani gjërat për të janë normalizuar.
Pandemia e coronavirusit: Situata ishte pak e çuditshme në javët e para, pastaj çdo gjë ka ardhur në normalitet. Gjërat kanë ardhur duke u normalizuar. Do të jetë shumë e vështirë për lojtarët dhe trajnerët që do të kthehen në fushë. Stërvitja? Këtu kam edhe unë pikëpyetjet e mia. Duhet të ishte dhënë leja për të nisur stërvitja. Ne po dëgjojmë në Europë për mënyrën se si stërviten dhe këtu kam disa pikëpyetje nëse klubet shqiptare kanë mundësi për të respektuar këto rregulla.
Rikthimi në Superiore: Nuk dua të flas shumë rreth kësaj, por unë dua të punoj. Kisha kontratë me Prishtinën, por kontrata u prish në mënyrë të njëanshme. Në fund të sezonit do të rikthehem si trajner te një skuadër që pretendon titullin.
Titulli i sezonit aktual: Tirana e ka të siguruar titullin kampion dhe për këtë gjë të jenë të sigurt të gjithë. Dua ta respektoj, pasi Tirana është pjesë e jetës sime qoftë si lojtar, tifoz apo trajner. Do të më bëhet qejfi shumë dhe më është bërë për atë ecuri që ka bërë. Për mua e para është fanella e Tiranës e pastaj ata që e drejtojnë.
