Pak ditë më parë kreu i Bashkisë së Tiranës, Erion Veliaj, ishte përballë gazetarit Endri Xhafo në Abcnews, ku po fliste lidhur me ndihmat dhe menazhimin e krizës nga koronavirusi në kryeqytet.
Ndaj Veliajt u drejtuan shumë pyetje nga qytetarë, mes të cilëve edhe Ervin Goxhaj, që drejton edhe degën e PD-së në njësinë 4, apo zonën e Kinostudios.
“Një i njohuri im më thotë: Endro se ke idenë sesi janë njerëzit poshtë, ne nuk shohim pyete pak se po bën show tek njësia 4, për kokë të çunave”, ishte reagimi i Goxhaj, ndërsa Veliaj deklaronte pakot që ishin shpërndarë me ndihma.
Por Kryebashkiaku tha se ai po mashtronte. “A ja pra. Të thuash është njëri që njoh unë. T’i vijë turp që bëri be kokën e djalit. Nuk kanë dhënë një koqe ve”, u shpreh Veliaj.
Ndërkohë përmes një postimi në rrjetet sociale, Goxhaj sqaron se “nisur nga njohja personale me gazetarin i nisa një sms në lidhje me mjerimin dhe skamjen në të cilën ndodhet Njësia 4 e Bashkisë Tiranë, por kryetari i pazgjedhur i saj u përgjigj për Degën 4 të Partisë Demokratike, jo për qytetarët që ka lënë në mëshirë të fatit”.
“Të jesh Kryetar Bashkie, do të thotë të jesh i të gjithë njerëzve pa dallim feje, gjinie, rrace e krahine, pa dallim nëse morën pjesë apo jo në farsën e “30 qershorit”.
Duke qenë se fjalët e shumta janë “erionllëk”, po të nis hallet e sotme të banorëve të Njesisë 4 të Bashkisë që refuzon të drejtosh. Janë hallet e sotme dt. 1 maj 2020, që asnjë media që paguhet nga “erionllëku” nuk i jep, sepse gazetaret që do të duhej të të gjurmonin këmba-këmbës i ke blerë dhe “erionistuohen” nëpër ndërmarrjet që duhet të ishin të këtyre hallexhinjve të mjerë!”, shkruan Goxhaj.
