Ambasada e SHBA në Tiranë ka vënë theksin sot në lirinë dhe paanshmërinë e mediave.
Përmes një postimi në rrjetet sociale, Ambasada shkruan se “dita botërore e Lirisë së Shtypit 2020 përkrah veprime që nxisin gazetarinë e pavarur”.
“Përse? Një shtyp i lirë dhe i paanshëm ngre pyetje dhe kërkon përgjigje në emër të shoqërisë. Media informon publikun dhe ndihmon në përhapjen e ideve, gjë e cila përmirëson qëndrueshmërinë sociale, politike dhe ekonomike”, thuhet në mesazhin e Ambasadës së SHBA.
Në Shqipëri liria e mediave ka pësuar përkeqësime. Paketës së ligjeve antishpifje të qeverisë, që rrezikojnë të rrisin kontrollin e qeverisë mbi median on line, i janë shtuar dhe dy krizat e njëpasnjëshme, ajo e tërmetit të 26 nëntorit të vitit të kaluar dhe kriza e Kovd 19. Gëzetarët raportojnë se dhe vetë media si industri ka problemet e saj të hershme sic janë informaliteti apo autoçensura. Ndërkohë përfaqësues të shumicës qeverisëse i hedhin poshtë kritikat për një presion të shtuar të qeverisë ndaj medias.
Organizatat që mbrojnë të drejtat e gazetarëve në botë dhe në Shqipëri vërejnë një përkeqësim të lirisë së medias. Së fundi reporterët pa kufij e klasifikuan Shqipërinë në vendin e 84, dy vende më poshtë se një vit më parë. Për zyrtarët e qeverisë kjo nuk luan rol në lirinë e medias. Ata thonë se 7 vjet me parë kur socialistët erdhën në qeverisje Shqipëria renditej 20 vende më poshtë. Me shqetësim shihen dhe nismat e qeverisë përmes paketës antishpifje, të cilat rrezikojnë të rrisin censurën, thuhet në raport.
