Nga BoldNews.al
Ministria e Shëndetësisë vijon të bëjë raportime konfuze lidhur me bilancin e COVID-19 në vend.
Ditën e Premte, në njoftimin e bilancit të ri, u tha se në Korçë ka një të prekur me koronavirus (rast aktiv), por asnjë rast të ri. Ndërkohë një ditë më parë (E Enjte), ministria bëri me dije se Korçë, që nga fillimi i pandemisë ishin infektuar 19 persona, dhe të gjithë ishin shëruar: pra dje numri i të prekurve aktivë rezultonte 0. Të Premten, njoftohet se numri i të prekurve aktivë është 1, ndërkohë që në Korçë nuk ka asnjë rast të ri. Raportimi flagrant shton dyshimet se shifrat po manipulohen.
Akuzat në këtë drejtim nuk kanë munguar në drejtim të qeverisë. Ish kryeministri Sali Berisha ka qenë ndër të parët që ka akuzuar kryeministrin Edi Rama se po fsheh numrin real të personave të prekur me COVID në vend, atyre që kanë humbur jetën dhe qytetarëve të shtruar në spitale. Sipas Berishës, kjo bëhet për të mbuluar dështimin në menaxhimin e situatës. Ish-ministri i Shëndetësisë Nard Ndoka, në një prononcim ekskluziv më herët për “BoldNews.al”, tha se vdekjet e personave të infektuar me koronavirusin e ri COVID-19 po fshihen nga autoritetet në funksion të propagandës.
“BoldNews.al” ka raportuar më herët për komunikimet konfuze të Ministrisë së Shëndetësisë lidhur me situatën e COVID në vend. Një rast është raportimi i numrit të viktimave nga virusi i ri: nuk sqarohen në asnjë moment kriteret e statistikave: Pse disa të infektuar që humbin jetën, nuk klasifikohen si “persona pozitivë me COVID-19 të vdekur” e të tjerë po.
Një terr informativ dhe informacione konfuze nga ana e autoriteteve që vështirë se mund të bindë se bilanci i COVID po manipulohet nga qeveria.
