Ish-ministri i Shëndetësisë Nard Ndoka shprehet se vdekjet e personave të infektuar me koronavirusin e ri COVID-19 po fshihen nga autoritetet në funksion të propagandës.
Në një prononcim për BoldNews.al, Ndoka shton se CODIV-SARS 2 jo vetëm që ka prekur qytetarë në vend që në muajt Dhjetor e Janar, por ka pasur edhe persona të infektuar me virus të cilët kanë humbur jetën. Ish-ministri shkon edhe më tej, duke deklaruar se mbi 10 pacientë të infektuar me virus kanë humbur jetën në këtë periudhë për shkak të moszbatimit të protokollit shëndetësor. “Numri i vdekjeve në Dhjetor e Janar është shumë i lartë. Rreth 15 persona kanë humbur jetën, sepse nuk është zbatuar protokolli për sëmundjet e mbartura. Nuk ju kanë bërë vizita e as ju kanë dhënë ilaçe për sëmundjet e tjera që mbartnin”, thotë ish kreu i Shëndetësisë.
Autoritetet dhe kryeministri Edi Rama në veçanti janë akuzuar nga opozita e jo vetëm, se po fshehin numrin real të personave të infektuar me koronavirus që kanë humbur jetën. Ministria e Shëndetësisë në fakt përcjell konfuzion në raportimet e numrit të viktimave nga virusi i ri, duke mos sqaruar në asnjë moment kriteret e statistikave: Pse disa të infektuar që humbin jetën, nuk klasifikohen si “persona pozitivë me COVID-19 të vdekur” e të tjerë po.
Një terr informativ nga ana e autoriteteve që vështirë se mund të bindë se numri i të vdekurve pozitiv me koronavirus nuk po fshihet enkas nga qeveria për qëllime propagandistike. /Boldnews.al/
