Ekzistojnë shqetësime për një simptomë të rëndë inflamatore te fëmijët, që mund të lidhet me koronavirusin.
Cilat janë shqetësimet?
Një situatë alarmante u krijua pasi disa fëmijë u paraqitën me simptoma të ngjashme me sëmundjen Kavasaki një sindromë potencialisht fatale që prek enët e gjakut duke përfshirë një temperaturë të lartë, presion të ulët të gjakut dhe vështirësi në frymëmarrje.
Sindroma dukej se ishte e ngjashme me reagimin imunitar të njohur si “stuhi citokine”, që shihet tek të rriturit me Covid-19.
Por këto simptoma të identifikuara tek fëmijët janë ngjarje të rralla dihet se janë prekur rreth 20 fëmijë deri më tani dhe jo të gjithë ata janë testuar pozitivë për Covid-19.
Edhe pse tejet e rrallë, ka pasur një numër të vogël rastesh të fëmijëve që janë sëmurë dhe kanë ndërruar jetë.
Rreziku në mosha të ndryshme
Mosha mesatare e personave që pranohen në njësitë e kujdesit kritik në Angli, Uells dhe Irlandën Veriore është 60 vjeç.
Ndërkohë, të dhënat nga Qendrat e SHBA-së për Kontrollin dhe Parandalimin e Sëmundjeve (CDC) sugjeruan se personat mbi 65 vjeç kanë dy herë më shumë mundësi të shtroheshin në spital koronavirus, sesa 50-64-vjeçarët – të cilët nga ana e tyre kishin tre herë më shumë mundësi të shtroheshin, sesa 18-49-vjeçarët. Personat nën-18 vjeç, janë grupi më pak i prekshëm.
“Fëmijët deri më tani përbëjnë midis 1% dhe 5% të rasteve të diagnostikuara nga Covid-19, shpesh kanë sëmundje më të butë se të rriturit dhe vdekjet kanë qenë jashtëzakonisht të rralla”, sipas Prof Adilia Uarris, një specialiste e sëmundjeve infektive pediatrike në Universitetin e Exeter.
Por, Prof Rosalind Smyth, këshilltare në mjekësinë e frymëmarrjes pediatrike në Great Ormond Street Hospital thekson se, “të kuptuarit tonë për këtë gjendje tek fëmijët është i kufizuar. Ne duhet t’i studiojmë plotësisht këta fëmijë, me SARS-CoV-2, të cilët paraqesin një sëmundje inflamatore për të vlerësuar, nëse kjo është një formë e prezantimit të Covid-19”, thotë ajo.
“Një nga shumë të panjohurat e shpërthimit të koronavirusit aktual është se sa fëmijë janë duke u infektuar dhe sa të tjerë janë duke e kaluar infeksionin”, thotë Prof Mattheë Snape në Universitetin e Oksfordit.
Ai do të fillojë hulumtimin se sa fëmijë dhe adoleshentë janë infektuar dhe sa kanë zhvilluar imunitet.
“Të kuptuarit e kësaj është jetike për të kuptuar se si të menaxhohet reagimi i shpërthimit, dhe më pas mund të kemi një ide se kur mund të rihapim shkollat,” thotë ai.
