Nga Boldnews.al
Ecën gjithnjë përpara turmës që e shoqëron, anjëherë paralel, e askush para tij, në çdo situatë, e kohë. Kur mërzitet në kështjellën e Kodrave të Surrelit, kryeministri Edi Rama bën ndonjë rrugë nëpër rrethe të ndryshme të vendit, në inagurime për dhjetra herë të një pune rutinë publike, ndjekje punimesh për të shumtën herë të një veprëze lokale që sado e vogël, tërheq si Thithlopë miliona euro. Në këtë rast nuk është ky qëllimi i shkrimit, por sjellja e Ramës me kryebashkiakët e tij.
Të emëruarit e partisë, edhe pa rivalë, gjithnjë kanë një drojë para Ramës, sado të pasur e pashallarë të “kuq” të quhen në vendin që administrojnë. Tundin shpesh kokën, aprovojnë çdo marrinë që thotë kryeministri, i plotësojnë çdo kërkesë absurde estetike. Dhe jo vetëm kaq, por bien në gjunjë para çdo kritike, sado e padrejtë që mund të jetë dhe qëndrojnë me gojën hapur për të pritur të dorëzuar çdo tekë të kryeministrit!
Dje ishte shfaqja e radhës, që nuk do të jetë kurrsesi e fundit! Ndalesa e parë në Fier. Udhëzonte kryebashkiakun sesi duhet të mbillte disa shkurre në skrapatën e lumit. Sugjeronte deri në vendim të padiskutueshëm inxhinierët për kryerjen e punimeve. Të gjithë mbanin shënim, askush nuk merrte guximin të kundërshtonte dhe thonte prerë: “Ky është projekti i miratuar, ndryshime nuk bëhen”!
Tund kokën në shenjë aprovimi kryebashkiaku Fierit, por tundës të tjerë kokash ka në 61 bashki të vendit! Komandant e quan Ramën kryebashkiaku “model” i Rilindjes Tërmet Peçi, që gjithsesi është nga të paktët që me sinqeritetin deri në naivitet, ku dukshëm e cilëson kryeministrin si prinjësin e vendit.
E djeshmja nuk mund të quhet ditë e mbarë për kryebashkiakun e Vlorës, Dritan Leli. Lelua i Jugut mori kritika. Se ku i shkuan sytë kryeministrit në nja dy gropa dhe e beri Lelin ti thahej goja nga sikleti, teksa mërmëriste: “do ta bëjmë, do ta rregullojnë”!
E akoma me rëndë ishte një inxhinier, i cili mbajti shënim “sugjerimet e shokut” lider. “Ato hekurat mbrojtëse të lyhen me të zezë, shkon mirë me pjesën tjetër” – tha Rama. E sigurt është se një bojë e zezë do porositet dhe ato dy gropëza në shëtitoren e Vlorës me siguri që mbrëmë janë mbyllur, për gjithë natën nga Lelua, nëse dëshiron që ta zerë “rehatë” gjumi natën.
Të tjerët mbanin shënim! Lider i madh shpirtëror ky Rilindasi ynë. Kryebashkiakët kudo që e presin nxjerrin armatën e ekskavatorëve qoftë edhe për të gërmuar kot, sa për imazh që në kronikën e radhës, të gjatë e të pështirë, qëllimi i së cilës është që vendi ti përngjajë një kantieri punimesh.
As i “madhi” Lali Eri i Tiranës nuk ka shpëtuar nga kritikat dhe shakatë plot “kripë” të kryeministrit Edi Rama. Në kohën e tërmetit tragjik të 26 nëntorit, Rama urdhëroi kryebashkiakun Veliaj që të zgjohej në katër të mëngjesit dhe të lyente vetë shkallët e një pallati, të cilat ishin zhgaravitur nga ndonjë dorë fëmije, por kreu i qeverisë e ka “zët” zhulin…!
“Thonj pa prerë dhe të palarë e mora nga Franca” – deklaroi në vitin 2004 ish-kryeministri Fatos Nano, por sot Rama thonjtë i ka të ngjashëm me ato të “Luanit”, për të rrëbyer çdo pre dhe kafshuar dhunshëm, (zakonisht janë paratë publike dhe koncesionet).
Sa ngjan në sjellje kryeministri ynë me Kim Jong Un të Koresë së Veriut. Në çdo dalje të atij lideri komunist, shihen një grup i madh ushtarakësh që mbajnë shënime në blloqe të trasha, duke treguar devotshmëri për ti kthyer në vepra fjalët e shokut Kim.
Tashmë Rama po mëson fshatarin sesi punohet toka, të sugjerojë mjekun se çfarë “ilaçesh” duhet të përdorë për shërimin e një sëmundje, apo edhe veterinerin për ndërzimin artificial! Të gjithë duhet të mbajnë shënim…! Shoku Kim në Kore, shoku Edi në Shqipëri!
