Teatri Kombëtar/ Veliaj s’pyet për Europa Nostra: Do shembet, godinë të re jam apo s’jam Kryebashkiak

Kryebashkiaku Erion Veliaj u shpreh i vendosur për shembjen e godinës aktuale të Teatrit Kombëtar.

Veliaj tha në një intervistë për Abcnews se mund të ketë shumë organizata që e përfshijnë Teatrin Kombëtar si një nga 7 mrekullitë e Botës, por kujt i duhet një godinë ku spektatorët shkojnë me batanije.

“Kështu ndodhi edhe me këndin e lodrave, edhe me Parkun e Liqenit, edhe me Astirin dhe ku jemi sot? Edhe atëherë dolën disa dhe kundërshtuan projektet tona, madje thonin se po të bëheshin këto projekte nuk do të kishte më PD.

Çfarë ndodhi? Edhe këndi i lodrave u bë, edhe te Parku i Liqenit u ndërtua një kënd lodrash, edhe puna për Unazën e Madhe ka nisur. Kështu do të ndodhë edhe me Teatrin Kombëtar.

Pavarësisht jam apo s’jam unë kryetar bashkie, ne do të kemi një Teatër të ri Kombëtar, sipas parametrave dhe do të jetë një nga godinat më të bukura”, tha Veliaj.

LEXO EDHE  Thirrja e fortë e ISHP: Evitoni sa më shumë përdorimin e kondicionerit

Pak kohë më parë, Europa Nostra u shpreh se Teatri Kombëtar i Shqipërisë përfshihet në listën e 7 Vendndodhjeve më të Rrezikuara në Europë.

“Europa Nostra – Zëri Europian i shoqërisë civile të angazhuar në mbrojtjen e trashëgimisë kulturore dhe natyrore – dhe organizata partnere e saj, Instituti i Bankës Europiane të Investimeve, kanë shpallur sot 7 Vendndodhjet e Trashëgimisë më të rrezikuara në Europë për vitin 2020.

Në këtë përzgjedhje, Teatri Kombëtar i Shqipërisë mori vlerësimin: Shembull i jashtëzakonshëm i arkitekturës moderne italiane të viteve 1930, i cili është një nga qendrat më të spikatura kulturore në vend, përballet me rrezikun e afërt të shembjes”, thuhet në deklaratë.