Mjekja Anika Dokle, vajza e ish-deputetit socialist Namik Dokle, një prej figurave qendrore të PS-së për më shumë se dz dekada, ka reaguar ashpër ndaj një propozimi të ish-ministrit të Shëndetësisë, Ilir Beqaj, i cili në një analizë të tij, ka propozuar disa zgjidhje të ngërçit ekonomik, ku mes tyre propozon dhe rishikimin e pensionëve dhe pagave.
Propozimi i Beqajt ka sjellë reagime të shumta në rrjetet sociale, por edhe publikisht nga emra të njohur të jetës sociale dhe politike të vendit.
Një prej atyre që ka reaguar është dhe mjekja Anika Dokle, e cila thotë se Beqaj, pasi ka përfituar para nga koncensionet, tashmë do që të marrë dhe paratë e pensionistëve.
‘Nuk i dolën koncesionet, jep mend dhe për pensionet. Zorrët në gojë…”,- shkruan Dokle.
Beqaj në analizën e tij shkruante se nga 1 maj 2020 deri në 31 dhjetor 2020, të gjithë të punësuarit e sektorit publik, institucione e ndërmarrje, qendrore e vendore, të varura e të pavarura, të paguhen me 90 % të pagës së tyre normale.
“Por jo më pak se paga minimale në shkallë vendi, duke përjashtuar edhe ata që janë në vijën e frontit të luftës. Paga mesatare mujore në sektorin publik është 63,000 lekë. Të punësuar janë rreth 172 mijë.
Krijojmë kështu një fond rreth 8,7 mld lekë (4,5 mld punonjës buxhetorë dhe 4,2 mld punonjës jobuxhetorë). Po kështu, çdo pension suplementar e shtesë pensioni suplementar (nëpunës i lartë shtetëror, ushtarak në lirim, profesor etj.) për tetë muajt e mbetur të vitit, të marrë 75 % të këstit mujor të muajit prill 2020”, shkruan Beqaj në analizën e tij, e cila nuk dihet nëse është thjesht një qëndrim personal, apo një projekt që është hedhur për diskutim.
