Gjykata e Posaçme ka pranuar kërkesën e të pandehurve Klodian Rrjepaj , Ilir Rrapaj, Matilda Serjani, Samir Kadiu, Petraq Mersini, Arben Gjata, Genci Byrazeri dhe Nail Ajazi, për t’u gjykuar me procedurën e gjykimit të shkurtuar në lidhje me aferën e koncesionit të sterilizimi.
I vetmi që do të gjykohet me procedura të zakonshme është ish-ministri i Shëndetësisë, Ilir Beqaj, pasi as ai dhe as avokati i tij, nuk kishin bërë kërkesë për gjykim të shkurtuar, dhe gjyqi ndaj tij do të vazhdojë me procedura të zakonshme, duke pretenduar se do të rrëzojë akuzën e ngritur nga GJKKO.
Për Ilir Beqajn, ish-zv.ministrin Klodian Rjepaj dhe për biznesmenin Ilir Rrapaj, dosja ka kaluar për veprën penale “vjedhje duke shpërdoruar detyrën në kuadër të grupit të strukturuar kriminal”, e cila është kundërshtuar edhe në seancën e sotme.
Gjatë seancës, Beqaj pretendoi se është hetuar një herë nga Krimet e Rënda dhe Prokuroria e Tiranës për çështjen në fjalë, e cila ka vendosur pushimin e procedimit dhe theksoi se ajo është vendim pafajësie për të. Po ashtu, ai tha dhe se akuzohet për vjedhje, por nuk jepet askund shuma se sa ka vjedhur.
DISKUTIMET NË SEANCË
Ilir Beqaj: I kërkova SPAK-ut disa herë të më japë një vendim të ish-Krimeve të Rënda, që e ka në arkivë. 5 herë e kam kërkuar dhe s’ma dhanë. E siguruam më pas nga Kuvendi, që na e dha, pasi ju kishte shkuar nga SPAK mes materialeve për komisionin hetimor.
Bëhet fjalë për vendimin e pushimit të një procedimi penal të prokurorit të Tiranës, Endrit Bimi. Ai vendim dhe vendimi i Prokuorisë së Tiranës, per mua janë pafajësi sipas parimit të gjësë së gjykuar. Ka dhe vendime unifikuese të Gjykatës së Lartë. I kujtoj gjykatës, që një nga rekomandimet e qeverisë të paraqitura nga ministri i Drejtësisë në Prokurorinë e Përgjithshme ishte: Sundimi i ligjit kërkohet respektimi strikt i të drejtave proceduralie të të pandehurve.
Prokurori i SPAK, Edvin Kondili: Në lidhje me kërkesën për pavlefshmëri të vendimit të gjyqtarit paraprak, kërkojmë rrëzim, si kërkesë e pa bazuar në ligj dhe në provë. Në lidhje me kërkesat për veçimin e të gjithë të pandehurve nga i pandehuri, Ilir Beqaj dhe gjykimin e shkurtuar, i konsiderojme të drejta. Gjykata e këshilluar në vend vendosi të hap shqyrtimin gjyqësore dhe i jep fjalen prokurorisë për të relatuar kërkesën për kalimin e çështjes për gjykim. Prokurori theksoi se ne jemi njohur me vendim e gjyqtarit të seancës parapake ne kërkojmë që kjo çështje të kalojë në të njëjtat ndryshime që bëri gjyqtari i seancës paraprake. Ilir Beqaj, Klodian Rjepaj dhe Ilir Rrapaj të gjykohen për “vjedhje duke shpërdoruar detyrën dhe grup kriminal”.
Avokati Ermal Yzeiraj: Unë jam i paqartë për akuzat, pasi prokuroria nuk e ka saktësuar akuzën sepse verbalisht thonë vjedhje duke shpërdoruar detyren dhe grup kriminal ndërsa me shkrim është “shpërdorim detyre”. Neve na kanë konunikuar vetëm akuzën e parë.
Ilir Beqaj: Në akt-akuzën që kam unë, shënohet vepra penale “shpërdorim detyre”. Këtu nuk shënohet askund “vjedhja”. Nuk ka një shifër për vjedhjen. Prokurori thoqë që qenka procesverbali i seancës akuzë. Prokuror, s’e keni thënë kurrë. Në seancë keni thënë vetëm “pranojmë”.
Hetimet gati 3-vjeçare të kryera nga SPAK kanë zbuluar shkelje të ligjit në procedurat e dhënies së njërit prej koncesioneve më të kushtueshme të sektorit të shëndetësisë, me qëllimin e vetëm të shpalljes fitues të kompanisë së Ilir Rrapajt dhe shtetasit Italian, Umbro Staccini. Referuar hetimeve, vlera e koncesionit që llogaritet rreth 100 milionë euro, është fryrë fiktivisht dhe dhjetëra milionë euro. Para që deri më tani, prokuroria nuk e ka zbuluar se në xhepat e kujt kanë shkuar.
Në lidhje me këtë dosje, SPAK lëshoi urdhër-arreste vetëm Klodjan Rrjepajn dhe Ilir Rrapajn në Gushtin e vitit të kaluar, por Ilir Beqaj u arrestua më vonë. Ai u vu në pranga në fillim të muajit korrik në lidhje me abuzimin me fondet e Bashkimit Europian gjatë kohës që ish-ministri drejtonte Agjencinë Shtetërore të Programimit Strategjik dhe Koordinimit të Ndihmës (SASPAC).
